ഗുവാഹത്തി : അണ്ടര്‍ 17 ലോകകപ്പ് ക്വാര്‍ട്ടര്‍ പോരാട്ടങ്ങള്‍ക്ക് ഇന്ന് തുടക്കം. ഇന്ന് രണ്ട് ക്വാർട്ടർ മല്‍സരങ്ങള്‍ നടക്കും. ഗുവാഹത്തിയില്‍ നടക്കുന്ന ആദ്യ ക്വാര്‍ട്ടറില്‍ ഘാന മലിയെ രണ്ടാം മത്സരത്തില്‍ ഇംഗ്ലണ്ട് അമേരിക്കയുംനേരിടും.
ഞായറാഴ്ചയാണ് കൊച്ചിയിലെ മത്സരം. ലോകകപ്പില്‍ ഏറെ സാധ്യത കല്‍പ്പിക്കപ്പെടുന്ന ടീമുകളിലൊന്നായ സ്‌പെയിന്‍ എഷ്യന്‍ കരുത്തരായ ഇറാനെ നേരിടും.വൈകീട്ട് അഞ്ചിനാണ് മല്‍സരം. യൂറോപ്യന്‍ ശക്തിയായ ഫ്രാന്‍സിനെ പരാജയപ്പെടുത്തിയാണ് സ്‌പെയിന്‍ ക്വാര്‍ട്ടറിലേക്ക് കുതിച്ചത്.മെക്‌സിക്കോയെ തകര്‍ത്താണ് ഇറാന്‍ ക്വാര്‍ട്ടറിലെത്തിയത്. ഗ്രൂപ്പ്ഘട്ടത്തില്‍ മൂന്നു കളിയും ജയിച്ചാണ് ഇറാന്‍ നോക്കൗട്ടിലേക്ക് മുന്നേറിയത്. മികച്ച ഫോമിലുള്ള സ്‌പെയിനെ ക്വാര്‍ട്ടറില്‍ മറികടക്കാനാകുമെന്ന പ്രതീക്ഷയിലാണ് ഇറാന്‍.
ഞായറാഴ്ച നടക്കുന്ന രണ്ടാമത്തെ മല്‍സരത്തില്‍ ലാറ്റിനമേരിക്കന്‍ കരുത്തരായ ബ്രസീല്‍, യൂറോപ്യന്‍ ടീമായ ജര്‍മ്മനിയെ നേരിടും. മികച്ച ഫോമിലുള്ള ഇരു ടീമുകളും തമ്മിലുള്ള പോരാട്ടം ഫുട്‌ബോള്‍ പ്രേമികള്‍ ഏറെ ആകാംക്ഷയോടെയാണ് കാത്തിരിക്കുന്നത്. ഞായറാഴ്ച രാത്രി എട്ടിനാണ് ബ്രസീല്‍ ജര്‍മ്മനി പോരാട്ടം.
