ബാങ്കോക്ക്:തായ്‌ലന്‍ഡിലെ ഗുഹയില്‍ കുടുങ്ങിയ 4 കുട്ടികളെക്കൂടി ഇന്ന് പുറത്തെത്തിച്ചു.ഇതോടെ മൊത്തം 8 പേരെ ഇതുവരെ രക്ഷപ്പെടുത്താനായി.ഇനി കോച്ച് അടക്കം അഞ്ചുപേരാണ് ഗുഹയിലുള്ളത്.രക്ഷാദൗത്യം തുടരുകയാണ്.
രാവിലെ 11 മണിയോടെയാണ്(ഇന്ത്യന്‍ സമയം 8.30)രക്ഷാപ്രവര്‍ത്തനം പുനരാരംഭിച്ചത്.പ്രദേശത്ത് കനത്ത മഴ പെയ്‌തെങ്കിലും അതൊന്നും കാര്യമാക്കാതെ രക്ഷാപ്രവര്‍ത്തകര്‍ വീണ്ടും ഗുഹയില്‍ പ്രവേശിച്ച് ദൗത്യം തുടരുകയായിരുന്നു.
ഇന്നലെ പുറത്തെത്തിച്ച് ആശുപത്രിയില്‍ പ്രവേശിപ്പിച്ച നാലു കുട്ടികളുടെ ആരോഗ്യനില തൃപ്തികരമാണെന്ന് അധികൃതര്‍ വ്യക്തമാക്കി.ഗുഹയില്‍നിന്ന് 60 കിലോമീറ്റര്‍ അകലെയുള്ള ചിയാങ് റായ് ആസ്പത്രിയിലാണ് കുട്ടികളുള്ളത്.അണുബാധയുണ്ടാകാതിരിക്കുന്നതിന് പ്രത്യേക വാര്‍ഡിലാണ് ഇവരെ ചികിത്സിക്കുന്നത്.കുടുംബാംഗങ്ങളെയും ഇവിടേക്ക് പ്രവേശിപ്പിക്കുന്നില്ല.
