ശബരിമല:ഇരുമുടിക്കെട്ടില്ലാതെ ശബരിമലക്ഷേത്രത്തിന്റെ പതിനെട്ടാംപടി കയറുന്നത് ആചാരലംഘനമെന്ന് തന്ത്രി കണ്ഡരര് രാജീവരര് പറഞ്ഞു.നിലവിലെ ആചാരമനുസരിച്ച് തന്ത്രിക്കും മേല്‍ശാന്തിക്കും പന്തളം രാജകുടുംബത്തിനും മാത്രമേ ഇരുമുടിക്കെട്ടില്ലാതെ പതിനെട്ടാംപടി കയറാനാകുമെന്നും തന്ത്രി വ്യക്തമാക്കി.ആചാരലംഘനവുമായി ബന്ധപ്പെട്ട് പരാതി വന്നാല്‍ ആവശ്യമായ പരിഹാരക്രിയകള്‍ നടത്തുമെന്നും തന്ത്രി അറിയിച്ചു.
ആര്‍.എസ്.എസ് നേതാവ് വത്സന്‍ തില്ലങ്കേരി ഇരുമുടിക്കെട്ടില്ലാതെ പതിനെട്ടാം പടിയില്‍ കയറി ആചാരലംഘനം നടത്തിയതായി ആരോപണം ഉയര്‍ന്നിരുന്നു. ആരോപണം അന്വേഷിക്കുമെന്ന് തിരുവിതാംകൂര്‍ ദേവസ്വം ബോര്‍ഡ് അറിയിച്ചു.ദേവസ്വം ബോര്‍ഡ് അംഗം കെ.പി.ശങ്കര്‍ദാസും ഇരുമുടിക്കെട്ടില്ലാതെ ശബരിമലയില്‍ കയറിയെന്നും ആരോപണം ഉയര്‍ന്നിരുന്നു.കഴിഞ്ഞ ദിവസം ചിത്തിര ആട്ടവിശേഷത്തിനായി നട തുറന്നപ്പോള്‍ മേല്‍ശാന്തിക്കൊപ്പം പതിനെട്ടാംപടിയില്‍ കയറുകയും ഇറങ്ങുകയും ചെയ്തുവെന്നാണ് ശങ്കര്‍ദാസിനെതിരെയുള്ള ആരോപണം.
