കോയമ്പത്തൂര്‍:ദുരന്ത പ്രതിരോധ പരിശീലനത്തിനിടെയുണ്ടായ അപകടത്തില്‍ 19കാരി മരിച്ചു.നരസിപുരം കോവൈ കലൈമകള്‍ ആര്‍ട്സ് ആന്റ് സയന്‍സ് കോളജിലെ ബിബിഎ രണ്ടാംവര്‍ഷ വിദ്യാര്‍ഥി എന്‍ ലോകേശ്വരിയാണ് മരിച്ചത്.ഇന്നലെ വൈകുന്നേരം നാലുമണിയോയൊയിരുന്നു അപകടം.
അപകടത്തിലാവുമ്പോള്‍ കെട്ടിടത്തിന്റെ മുകളില്‍നിന്നും രക്ഷപ്പെടുന്നത് എങ്ങനെയെന്ന് മോക്ഡ്രില്‍ നടത്തുകയായിരുന്നു.രണ്ടാം നിലയുടെ സണ്‍ഷേഡില്‍നിന്നും താഴേക്ക് ചാടാന്‍ പരിശീലകന്‍ ആവശ്യപ്പെട്ടെങ്കിലും പെണ്‍കുട്ടി വിസമ്മതിച്ചു.തുടര്‍ന്ന് പരിശീലകന്‍ കുട്ടിയെ തള്ളിവീഴ്ത്തുകയായിരുന്നു.എന്നാല്‍ ആയമില്ലാതെ വീണതിനാല്‍ താഴത്തെ സണ്‍ഷേഡില്‍ തലയിടിച്ച്‌ തെറിച്ചുവീഴുകയായിരുന്നു.സഹപാഠികള്‍ താഴെ വല പിടിച്ചുനിന്നെങ്കിലും ലോകേശ്വരി വലയില്‍ നിന്നും മാറിയാണ് വീണത്.
കുട്ടിയെ ഉടന്‍ കോയമ്പത്തൂര്‍ മെഡിക്കല്‍കോളജിലെത്തിച്ചെങ്കിലും മരണം സംഭവിച്ചു.പരിശീലകനായ അറുമുഖനെ പൊലീസ് കസ്റ്റഡിയിലെടുത്തു.ദേശീയ ദുരന്തനിവാരണ അഥോറിറ്റിയുടെ പരിപാടിയായിരുന്നു നടന്നത്.
