ഭോപ്പാല്‍:മധ്യപ്രദേശില്‍ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി പങ്കെടുത്ത തെരഞ്ഞെടുപ്പു റാലിയില്‍ ബലൂണുകള്‍ക്ക് തീപിടിച്ചു.ആര്‍ക്കും പരിക്കില്ല.സംഭവത്തില്‍ സുരക്ഷാവീഴ്ചയില്ലെന്നാണ് റിപ്പോര്‍ട്ട്.
മധ്യപ്രദേശിലെ ജബല്‍പൂരില്‍ നിയമസഭാ തിരഞ്ഞെടുപ്പു പ്രചരണത്തിനെത്തിയതായിരുന്നു രാഹുല്‍.കോണ്‍ഗ്രസ് നേതാക്കളായ കമല്‍നാഥ്, ജ്യോതിരാദിത്യ സിന്ധ്യ എന്നിവര്‍ക്കൊപ്പം രാഹുല്‍ ഗാന്ധി തുറന്ന വാഹനത്തില്‍ പ്രവര്‍ത്തകരെ അഭിസംബോധന ചെയ്തു നീങ്ങുന്നതിനിടെയാണ് സംഭവം.
രാഹുലിന് ആരതിയുഴിയാന്‍ പ്രവര്‍ത്തകര്‍ കൊണ്ടുവന്ന വിളക്കില്‍ നിന്നാണ് സമീപത്തുണ്ടായിരുന്ന ബലൂണുകളിലേക്ക് തീ പടര്‍ന്നത്.സംഭവത്തില്‍ സുരക്ഷാവീഴ്ചയില്ലെന്നാണ് പോലീസ് പറയുന്നത്.
