ചെന്നൈ: വിജയ് ആരാധകര്‍ ആകാംക്ഷയോടെ കാത്തിരിക്കുന്ന ചിത്രം ബിഗിലിന്റെ ട്രെയിലര്‍ പുറത്തിറങ്ങി. ദീപാവലി റിലീസായി എത്തുന്ന ചിത്രത്തിന്റെ ട്രെയിലര്‍ ആക്ഷന് പ്രാധാന്യം നല്‍കികൊണ്ടാണ് ഒരുക്കിയിരിക്കുന്നത്. ഒരു ചെറിയ ഇടവേളയ്ക്ക് ശേഷം വിജയ്-നയന്‍താര ഒന്നിക്കുന്ന ചിത്രമാണിത്. തെറി, മെര്‍സല്‍ എന്നീ ഹിറ്റുചിത്രങ്ങള്‍ക്കു ശേഷം അറ്റ്‌ലീ ഒരുക്കുന്ന ചിത്രത്തില്‍ വനിത ഫുട്‌ബോള്‍ ടീം കോച്ചായിട്ടാണ് വിജയ് എത്തുന്നത്. ഒരു സ്‌പോര്‍ട്‌സ് ത്രില്ലര്‍ ഗണത്തില്‍ ഉള്‍പ്പെടുത്താന്‍ കഴിയുന്ന ചിത്രമായിരിക്കും ഇത്. വിവേക്, ജാക്കി ഷറോഫ്, രാജ്കുമാര്‍, ദേവദര്‍ശിനി, യോഗി ബാബു, സൗന്ദര്യരാജ, ഐ.എം.വിജയന്‍, വര്‍ഷ ബൊമ്മല്ലു തുടങ്ങിയവരും ചിത്രത്തില്‍ പ്രധാന കഥാപാത്രങ്ങളായി എത്തുന്നുണ്ട്. ഈ ചിത്രത്തിന് സംഗീതമൊരുക്കിയിരിക്കുന്നത് സംഗീതമാന്ത്രികന്‍ എ.ആര്‍.റഹ്മാനാണ്. കേരളത്തില്‍ പൃഥിരാജ് പ്രൊഡക്ഷന്‍സും ലിസ്റ്റിന്‍ സ്റ്റീഫന്റെ മാജിക് ഫ്രെയിംസും ചേര്‍ന്നാണ് ചിത്രം തീയറ്റേറില്‍ എത്തിക്കുന്നത്. ഇതുവരെ ഒരു തമിഴ് ചിത്രത്തിനും ലഭിക്കാത്ത തുകയ്ക്കാണ് ചിത്രത്തിന്റെ വിതരണാവകാശം വിറ്റുപോയിരിക്കുന്നത്.
