27 വര്‍ഷങ്ങള്‍ക്കു ശേഷം സ്റ്റൈല്‍മന്നന്‍ രജനീകാന്ത് പോലീസ് വേഷത്തിലെത്തുന്ന ചിത്രം ദര്‍ബാറിന്റെ മോഷന്‍ പോസ്റ്റര്‍ റിലീസ് ചെയ്തു. എ.ആര്‍.മുരുകദോസ് സംവിധാനം ചെയ്യുന്ന ചിത്രത്തില്‍ ആദിത്യ അരുണാചലം എന്ന പോലീസ് ഉദ്യോഗസ്ഥന്റെ വേഷത്തിലാണ് രജനി എത്തുന്നത്. പേ്ട്ടയുടെ വമ്പന്‍ വിജയത്തിനു പിന്നാലെയാണ് തലൈവരുടെ പുതിയ സിനിമ എത്തുന്നത്. നയന്‍താരയാണ് നായികായായെത്തുന്നത്. അനിരുദ്ധ് രവിചന്ദറിന്റെ പശ്ചാത്തല സംഗീതത്തിന്റെ അകമ്പടിയോടെയാണ് ദര്‍ബാറിന്റെ മോഷന്‍ പോസ്റ്റര്‍ പുറത്തിറക്കിയിരിക്കുന്നത്. കൈയില്‍ വാളേന്തി നില്‍ക്കുന്ന രജനിയുടെ ലുക്ക് ആരാധകരെ ഒന്നടങ്കം ആവേശത്തിലാഴ്ത്തിയിരിക്കുകയാണ്. 3 മില്യണിലധികം ആളുകളാണ് ഈ വീഡിയോ യൂട്യൂബില്‍ കണ്ടുകഴിഞ്ഞത്. കമല്‍ഹാസന്‍, മോഹന്‍ലാല്‍, സല്‍മാന്‍ഖാന്‍, മഹേഷ് ബാബു തുടങ്ങിയവരാണ് മോഷന്‍ പോസ്റ്റര്‍ പുറത്തിറക്കിയത്. സുനില്‍ഷെട്ടി, പ്രതിക് ബബ്ബാര്‍, യോഗി ബാബു, ജീവ, പ്രകാശ് രാജ്, നിവേദ തോമസ്, ദലിപ് താഹിര്‍, സൂരി, ഹരീഷ് ഉത്തമന്‍, മനോബാല, സുമന്‍, ആനന്ദരാജ് തുടങ്ങിയവരാണ് ദര്‍ബാറില്‍ മറ്റു പല വേഷങ്ങളില്‍ എത്തുന്നത്. സന്തോഷ് ശിവനാണ് സിനിമയുടെ ഛായാഗ്രഹണം നിര്‍വ്വഹിച്ചിരിക്കുന്നത്. ലൈക്ക പ്രൊഡക്ഷന്‍സ് ചിത്രം നിര്‍മ്മിക്കുന്നു. പൊങ്കല്‍ റിലീസായി ചിത്രം പുറത്തിറക്കും.
