പിടിച്ചുനിൽക്കാൻ ഒരു ഹിറ്റ് ചിത്രം കൂടിയേ കഴിയൂ എന്ന അവസ്ഥയിൽ നിൽക്കുന്ന നിവിന്‍ പോളിയുടെ പുതിയ ചിത്രമായ മൂത്തോന്‍ സിനിമയുടെ ട്രെയിലര്‍ പുറത്തിറക്കി. അദ്ദേഹത്തിന്റെ പിറന്നാള്‍ ദിനമായ ഒക്ടോബര്‍ 11-നു തന്നെ ചിത്രത്തിന്റെ ട്രെയിലര്‍ റലീസ് ചെയ്തു എന്ന പ്രത്യേകതയുമുണ്ട്. മൂത്തോന്‍ സംവിധാനം ചെയ്തിരിക്കുന്നത് മലയാളത്തിന്റെ പ്രിയനടി ഗീതുമോഹന്‍ദാസ് ആണ്. നിവിന്റെ ആരാധകര്‍ വളരെ പ്രതീക്ഷയോടുകൂടി കാത്തിരിക്കുന്ന ചിത്രം കൂടിയാണിത്. കരിയറിലെ തന്നെ ഏറ്റവും വ്യത്യസ്തമായ വേഷമാണ് നിവിന്‍ ഇതില്‍ കൈകാര്യം ചെയ്തിരിക്കുന്നത്. ഇപ്പോള്‍ നില്‍ക്കുന്ന സെയ്ഫ്‌സോണില്‍ നിന്നുള്ള മാറ്റം നമുക്ക് ഈ ട്രെയിലറില്‍ തന്നെ വ്യക്തമാണ്. മുടിയൊക്കെ പറ്റവെട്ടി , പരുക്കന്‍ വേഷമുള്ള അധോലോകനായകന്റെ ഗെറ്റപ്പാണിതില്‍. ടൊറന്റോ ഇന്റര്‍നാഷണല്‍ ഫിലിം ഫെസ്റ്റിവലുകളില്‍ ഉള്‍പ്പെടെ നിരൂപക പ്രശംസ നേടിയ ഈ ചിത്രത്തിന്റെ ഹിന്ദി ഡയലോഗുകള്‍ രചിച്ചിരിക്കുന്നത് പ്രശസ്ത ബോളിവുഡ് സംവിധായകനും, നിര്‍മ്മാതാവും നടനുമായ അനുരാഗ് കശ്യപാണ്. മാത്രമല്ല അദ്ദേഹം ഈ സിനിമയുടെ സംവിധാന പങ്കാളിയുമാണ്. രാജീവ് രവി ചിത്രത്തിന്റെ ഛായാഗ്രഹണം നിര്‍വ്വഹിച്ചിരിക്കുന്നു. നായികാവേഷത്തിലെത്തുന്നത് ഉത്തരേന്ത്യക്കാരിയായ ശോഭിതയാണ്. റോഷന്‍ മാത്യു, ശശാങ്ക് അറോറ തുടങ്ങിയ താരങ്ങളും ചിത്രത്തില്‍ അഭിനയിക്കുന്നുണ്ട്. നവംബര്‍ എട്ടിന് ചിത്രം റിലീസ് ചെയ്യുമെന്നാണ് റിപ്പോര്‍ട്ടുകള്‍.
