കൊച്ചി: ഐഎസ്എല്‍ നാലാം സീസണിലെ ആദ്യ മത്സരത്തില്‍ സമനിലകൊണ്ട് തൃപ്തിപ്പെടേണ്ടി വന്ന ബ്ലാസ്റ്റേഴ്സ് ആദ്യ ജയം തേടി ഇന്ന് നവാഗതരായ ജംഷേദ്പുറിനെ നേരിടും. ബ്ലാസ്റ്റേഴ്സിന്റെ സ്വന്തം തട്ടകമായ കൊച്ചി ജവഹര്‍ ലാല്‍ നെഹ്റു സ്റ്റേഡിയത്തിലാണ് മത്സരം നടക്കുന്നത്. കഴിഞ്ഞ കളിയില്‍ നിറം മങ്ങിയെങ്കിലും ബെര്‍ബറ്റോവിലും സി.കെ വിനീതിലും ഇയാന്‍ ഹ്യൂമിലും അമിത പ്രതീക്ഷയര്‍പ്പിച്ചാണ് ബ്ലാസ്റ്റേഴ്സ് ഇറങ്ങുന്നത്. മറുവശത്ത് ജംഷേദ്പുരും ആദ്യ അങ്കത്തില്‍ സമനില വഴങ്ങിയാണ് കൊച്ചിയിലെത്തിയത്. കഴിഞ്ഞ സീസണില്‍ കേരളത്തിനൊപ്പമുണ്ടായിരുന്ന കോച്ച് സ്റ്റീവ് കോപ്പല്‍, ഫോര്‍വേഡ് കെര്‍വന്‍സ് ബെല്‍ഫോര്‍ട്ട്, മിഡ്ഫീല്‍ഡര്‍ മെഹ്താബ് ഹുസൈന്‍ എന്നിവരുടെ അനുഭവ സമ്പത്തിലാണ് ജംഷേദ്പുരിന്റെ പ്രതീക്ഷയത്രയും.
ആദ്യ മത്സരത്തില്‍ മികച്ച പ്രകടനം കാഴ്ചവച്ച മിലന്‍ സിങ്ങിനെ സൈഡ് ബെഞ്ചിലേക്ക് മാറ്റി ജാക്കിചന്ദ് സിങ്ങിനെ ആദ്യ ഇലവനില്‍ ഉള്‍പ്പെടുത്തിയതാണ് ബ്ലാസ്റ്റേഴ്സില്‍ വന്ന മാറ്റം. മലയാളി താരം കെ പ്രശാന്ത് ഇത്തവണയും പകരക്കാരുടെ ബെഞ്ചിലാണ്.
