ഇടുക്കി:ഇടുക്കി മാങ്കുളത്ത് ആള്‍ക്കൂട്ട ആക്രമണം.70 കാരനെ പട്ടാപ്പകല്‍ റോഡിലിട്ട് മര്‍ദിച്ച അഞ്ചുപേര്‍ക്കെതിരെ പോലീസ് കേസെടുത്തു. പത്താം മൈല്‍ സ്വദേശിയായ മല്‍സ്യവ്യാപാരി മക്കാര്‍ താണോലിക്കാണ് മര്‍ദനമേറ്റത്.
കഴിഞ്ഞ വ്യാഴാഴ്ചയാണ് വ്യാപാരിക്ക് മര്‍ദനമേറ്റത്.വര്‍ഷങ്ങളായി പ്രദേശത്ത് മീന്‍കച്ചവടം നടത്തിക്കൊണ്ടിരിക്കുന്ന മക്കാര്‍ താണോലി ജോര്‍ജ് എന്നയാള്‍ വാങ്ങിയ മീനിന്റെ പണം ചോദിച്ചതാണ് സംഭവത്തിനു കാരണമായി പറയുന്നത്.തുടര്‍ന്ന് ജോര്‍ജിന്റെ മകനും കൂട്ടുകാരും ചേര്‍ന്ന് പട്ടാപ്പകല്‍ റോഡിലിട്ട് മക്കാര്‍ താണോലിയെ ക്രൂരമായി മര്‍ദിക്കുകയായിരുന്നു.
മര്‍ദനത്തില്‍ പരുക്കേറ്റ താണോലി ഇപ്പോള്‍ സ്വകാര്യആശുപത്രിയില്‍ ചികില്‍സയിലാണ്. മര്‍ദനത്തിന്റെ ദൃശ്യങ്ങള്‍ സമൂഹമാധ്യമങ്ങളിലൂടെ പ്രചരിച്ചതോടെയാണ് പോലീസ് സംഭവം അറിയുന്നത്.തുടര്‍ന്ന് പോലീസ് കേസെടുത്ത് പ്രതികളെ അറസ്റ്റ് ചെയ്യുകയായിരുന്നു.
