ആലപ്പുഴ:ചാലക്കുടിയിലെ എല്‍ഡിഎഫ് സ്ഥാനാര്‍ത്ഥി ഇന്നസെന്റ് എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശനുമായി കൂടിക്കാഴ്ച നടത്തി.സമുദായ നേതാക്കളെ കാണുന്നതിന്റെ ഭാഗമായാണ് ഇന്നസെന്റ് ആലപ്പുഴയിലെ വസതിയിലെത്തിയത്.
ജനങ്ങള്‍ക്കിടയിലേക്കിറങ്ങിയാണ് ഇന്നസെന്റ് പ്രവര്‍ത്തിക്കുന്നത്. എതിര്‍ സ്ഥാനാര്‍ത്ഥിയെന്നല്ല ആരെക്കുറിച്ചും അധികം വിമര്‍ശനം ഉന്നയിക്കാത്ത ആളാണ് ഇന്നസെന്റെന്നും അതാണ് ഇന്നസെന്റിനെ മറ്റുള്ളവരില്‍ നിന്നും വ്യത്യസ്തനാക്കുന്നതെന്നും വെള്ളാപ്പള്ളി പറഞ്ഞു. എന്നാല്‍ ഇന്നസെന്റിനെ പിന്തുണയ്ക്കുമോ എന്ന കാര്യത്തിലൊന്നും
വെള്ളാപ്പള്ളി അഭിപ്രായം പറഞ്ഞില്ല.
ആലപ്പുഴയില്‍ ആരിഫ് തോറ്റാല്‍ തല മൊട്ടയടിക്കുമെന്ന് പറഞ്ഞത് രസത്തിനെന്ന് വെള്ളാപ്പള്ളി പറഞ്ഞു.ഷാനിമോള്‍ ഉസ്മാന് തോല്‍ക്കുന്ന സീറ്റ് നല്‍കി കോണ്‍ഗ്രസ് ചതിക്കുകയായിരുന്നുവെന്നും വെള്ളാപ്പള്ളി പറഞ്ഞു. തുഷാര്‍ മല്‍സരിച്ചാല്‍ തോല്‍ക്കുമെന്നും വെള്ളാപ്പള്ളി ആവര്‍ത്തിച്ചു.
എന്‍എസ്എസ് ആസ്ഥാനത്ത് വോട്ട് ചോദിച്ചു പോകില്ലെന്ന് ഇന്നസെന്റ് പറഞ്ഞു.എന്നാല്‍ ചാലക്കുടിയിലെ സമുദായ നേതാക്കളോട് വോട്ടുചോദിക്കുമെന്നും ഇന്നസെന്റ് വ്യക്തമാക്കി.
