തിരുവനന്തപുരം: ഐ.എഫ്.എഫ് കെ യ്ക്ക് സമാന്തരമായി കാഴ്ച ഇന്‍ഡി ഫിംലിം ഫെസ്റ്റിവലുമായി സനല്‍ കുമാര്‍ ശശിധരന്‍. ഐ.എഫ്.എഫ് കെ നടക്കുന്ന ഡിസംബര്‍ 8,9,10,11 തീയതികളില്‍ തന്നെയാവും കിഫും നടക്കുക. ഇന്ത്യയിലെ ഇതര ഭാഷകളിലെ പ്രധാന സിനിമകള്‍ ഉള്‍പ്പടെ 12 സിനിമകള്‍ സമാന്തര സിനിമാപ്രദര്‍ശനത്തില്‍ ഉണ്ടാവുമെന്ന് സനല്‍ കുമാര്‍ ശശിധരന്‍ മാധ്യമങ്ങളോട് പറഞ്ഞു.
കഴിഞ്ഞ 16 വര്‍ഷമായി സ്വതന്ത്ര സിനിമാ പ്രവര്‍ത്തനങ്ങള്‍ നടത്തുന്ന സൊസൈറ്റിയാണ് കാഴ്ച്ച ചലച്ചിത്ര വേദി. അന്തര്‍ദേശീയ തലത്തില്‍ മലയാളത്തിലെ സ്വതന്ത്ര സിനിമാ പ്രസ്ഥാനത്തിന് യശസ്സുണ്ടാക്കിക്കൊടുത്ത സെക്‌സി ദുര്‍ഗ്ഗ ഉള്‍പ്പെടെയുള്ള സിനിമകളുടെ നിര്‍മ്മാതാവാണ് നിവ് ആര്‍ട്ട് മൂവീസ്. കാഴ്ച്ച ചലച്ചിത്ര വേദിയും നിവ് ആര്‍ട്ട് മൂവീസും സംയുക്തമായി സംഘടിപ്പിക്കുന്ന പരിപാടി അക്കാദമിയുടെ കെട്ടുകാര്യസ്ഥതയ്‌ക്കെതിരെയുള്ള പ്രതിഷേധമാണ്. എന്നാല്‍ വരും വര്‍ഷങ്ങളില്‍ സ്വതന്ത്ര സിനിമാക്കാര്‍ക്ക് കഴിവുകാണിക്കുവാനുള്ള വേദിയായി കെ.ഐ.എഫ്.എഫ് മാറുമെന്നും സനല്‍ കുമാര്‍ ശശിധരന്‍ പറഞ്ഞു.
കിഫിന്റെ നടത്തിപ്പിനായുള്ള പണം സമാഹരിക്കുന്നതിലേക്കായി തിരുവനന്തപുരത്ത് ഏരീസ് പ്‌ളക്‌സിലെ ഓഡി -1 ല്‍ സെക്‌സി ദുര്‍ഗയുടെ കേരളത്തിലെ പ്രിമിയര്‍ നടത്തുമെന്ന് സംവിധായകന്‍ സനല്‍ കുമാര്‍ ശശിധരന്‍ ഫേസ്ബുക്കില്‍ പങ്കുവെച്ചു.
പോസ്റ്റിന്റെ പൂര്‍ണ്ണരൂപം..
‘ ഇന്ത്യയില്‍ നിന്ന് ആദ്യമായി റോട്ടര്‍ഡാം ഫിലിം ഫെസ്റ്റിവലിലെ ടൈഗര്‍ അവാര്‍ഡ് നേടുന്ന ചലച്ചിത്രം എന്നതുള്‍പ്പെടെ അന്താരാഷ്ട്രതലത്തില്‍ നിരവധി അവാര്‍ഡുകള്‍ സെക്‌സി ദുര്‍ഗയ്ക്ക് ലഭിച്ചിട്ടും കേരള ചലച്ചിത്ര അക്കാദമി ആ സിനിമയോട് ശത്രുതാപരമായ ഇടപെടലാണ് നടത്തുന്നത്. സമാന്തരപ്രദര്‍ശനം നടത്തുന്നതിനുപോലും വേദി ലഭ്യമാക്കാതിരിക്കാന്‍ ചലച്ചിത്ര അക്കാദമി അധാര്‍മികമായി ഇടപെടല്‍ നടത്തി. സാംസ്‌കാരിക വകുപ്പിനു കീഴിലുള്ള ഭാരത് ഭവന്‍ കിഫിന്റെ നടത്തിപ്പിനായി ലഭ്യമാക്കുന്നത് അക്കാദമി ഇടപെട്ട് തടയുകയാണുണ്ടായത്. എന്നാല്‍ അക്കാദമിയുടെതില്‍ നിന്നും വ്യത്യസ്തമായി ഇതര സ്ഥാപനങ്ങളില്‍ നിന്നും വ്യക്തികളില്‍ നിന്നും അനുഭാവപൂര്‍വമായ നിലപാടാണ് സെക്‌സി ദുര്‍ഗയ്ക്ക് ലഭിക്കുന്നത്. കിഫിന്റെ നടത്തിപ്പിനായി ഇന്ത്യയിലെ തന്നെ ഏറ്റവും മികച്ച പ്രൊജക്ഷന്‍ സൗകര്യമുള്ള ഏരീസ് പ്‌ളക്‌സ് സൗജന്യമായി ലഭ്യമാക്കാമെന്ന് സംവിധായകന്‍ ബി ഉണ്ണികൃഷ്ണന്‍ പറഞ്ഞത് അതിന് ഏറ്റവും വലിയ ഉദാഹരണമാണ്.
അഞ്ഞൂറുരൂപയുടെ സംഭാവന കൂപ്പണ്‍ വിതരണം ചെയ്തുകൊണ്ടാണ് സെക്‌സി ദുര്‍ഗയുടെ പ്രിമിയര്‍ ഷോ നടത്തുക. എഴുനൂറുപേര്‍ക്കാണ് ഏരീസ് പ്‌ളക്‌സിലെ ഓഡി-1 ല്‍ സിനിമ കാണാന്‍ അവസരമുണ്ടാവുക. സംഭാവനയായി ലഭിക്കുന്ന മുഴുവന്‍ തുകയും കിഫിന്റെ നടത്തിപ്പിലേക്കായി നല്‍കുമെന്ന് നിവ് ആര്‍ട്ട് മൂവീസ് പ്രൊപ്രൈറ്ററും സെക്‌സി ദുര്‍ഗയുടെ പ്രൊഡ്യൂസറുമായ ഷാജി മാത്യു അറിയിച്ചിട്ടുണ്ട്.‘
കാഴ്ച ചലച്ചിത്രവേദി പ്രവര്‍ത്തകര്‍ വഴിയാണ് കൂപ്പണുകള്‍ വിതരണം ചെയ്യുന്നത്. താല്പര്യമുള്ളവര്‍ക്ക് കാഴ്ച ചലച്ചിത്രവേദിയുടെ kfftvm@gmail.com എന്ന വിലാസത്തില്‍ ബന്ധപ്പെടാവുന്നതാണ്.
