കാസര്‍കോട്:ഉപ്പള നയാബസാര്‍ ദേശീയപാതയില്‍ ജീപ്പും ലോറിയും കൂട്ടിയിടിച്ച് ഒരു കുടുംബത്തിലെ അഞ്ചുപേര്‍ മരിച്ചു.ജീപ്പ് യാത്രക്കാരായ ബീഫാത്തിമ(65), നസീമ,അസ്മ, ഇംതിയാസ്,മുഷ്താഖ് എന്നിവരാണ് മരിച്ചത്.തിങ്കളാഴ്ച്ച രാവിലെ ആറ് മണിയോടെയാണ് അപകടം.കര്‍ണാടകയിലെ ഉള്ളാളിനടുത്ത് അജിനടുക്ക കെ സി റോഡ് സ്വദേശികളാണ് മരിച്ചത്.ബീഫാത്തിമയുടെ മകളുടെ ഗൃഹപ്രവേശച്ചടങ്ങില്‍ പങ്കെടുക്കാന്‍ പാലക്കാട് പോയശേഷം തിരികെ മടങ്ങുമ്പോഴായിരുന്നു അപകടം.
ഇടിയുടെ ആഘാതത്തില്‍ ജീപ്പിന്റെ മുന്‍വശം പൂര്‍ണമായും തകര്‍ന്നു.ലോറിയും കര്‍ണാടക റജിസ്‌ട്രേഷനിലുള്ളതാണ്.ജീപ്പില്‍ യാത്രചെയ്തിരുന്ന എട്ടുപേര്‍ക്ക് പരിക്കേറ്റു.ഇവരില്‍ രണ്ടുപേരുടെ നില ഗുരുതരമാണ്.പരിക്കേറ്റവരെ മംഗലാപുരത്തെ സ്വകാര്യ ആശുപത്രിയില്‍ പ്രവേശിപ്പിച്ചു.
