മെഗസ്റ്റാര്‍ മമ്മൂട്ടിയെ നായകനാക്കി സന്തോഷ് വിശ്വനാഥ് സംവിധാനം ചെയ്യുന്ന വണ്ണിന്റെ ഫസ്റ്റ്‌ലുക്ക് പോസ്റ്റർ പുറത്ത്. വെള്ളഷര്‍ട്ടും, മുണ്ടും ധരിച്ച് കണ്ണട വച്ച് കസേരയില്‍ ഗൗരവത്തോടെ ഇരിക്കുന്ന ചിത്രമാണ് പോസ്റ്ററിലുള്ളത്.
കേരള മുഖ്യമന്ത്രി കടയ്ക്കല്‍ ചന്ദ്രന്‍ എന്ന കഥാപാത്രമായാണ് ഈ സിനിമയില്‍ മമ്മൂട്ടി എത്തുന്നത്. ഇതിനോടകം തന്നെ ഈ ചിത്രം സോഷ്യല്‍ മീഡിയയില്‍ വൈറലാകുകയാണ്. ബോബി സഞ്ജയ് ആണ് തിരക്കഥയൊരുക്കുന്നത്. സംയുക്താ മേനോനും, ഗായത്രി അരുണുമാണ് ചിത്രത്തില്‍ നായികമാരായെത്തുന്നത്. ജോജു ജോര്‍ജ്ജ്, സംവിധായകന്‍ രഞ്ജിത്ത്, സലീംകുമാര്‍, മുരളി ഗോപി, ബാലചന്ദ്രമേനോന്‍, ശങ്കര്‍ രാമകൃഷ്ണന്‍, മാമുക്കോയ, ശ്യാമപ്രസാദ്, രമ്യ, അലന്‍സിയര്‍, സുരേഷ് കൃഷ്ണ, മാത്യു തോമസ്, മേഘനാഥന്‍, സുദേവ് നായര്‍, മുകുന്ദന്‍, സുധീര്‍ കരമന, ബാലാജി, നന്ദു, വെട്ടുക്കിളി പ്രകാശ്, തുടങ്ങിയ താരങ്ങളാല്‍ സമ്പന്നമാണീ സിനിമ. ചിറകൊടിഞ്ഞ കിനാവുകള്‍ സ്പൂഫ് ചിത്രം ഒരുക്കിയ സന്തോഷ് വിശ്വനാഥാണ് സിനിമ സംവിധാനം ചെയ്യുന്നത്. റഫീഖ് അഹമ്മദിന്റെ വരികള്‍ക്ക് സംഗീതം നല്‍കിയിരിക്കുന്നത് ഗോപിസുന്ദറാണ്. ശ്രീ ലക്ഷ്മി ആര്‍ ആണ് ചിത്രം നിര്‍മ്മിക്കുന്നത്.
