തിരുവനന്തപുരം:കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി ഇന്ന് സംസ്ഥാനത്തെത്തും.യുഡിഎഫിന്റെ തെരഞ്ഞെടുപ്പ് പ്രചരണത്തിന്റെ ഔദ്യോഗിക ഉദ്ഘാടനം രാഹുല്‍ നിര്‍വഹിക്കും.ഇന്ന് വൈകുന്നേരം തിരുവനന്തപുരത്തെത്തുന്ന രാഹുല്‍ വിമാനമാര്‍ഗം കൊച്ചിയിലേക്ക് പോകും.ഇന്ന് തൃശൂര്‍ രാമ നിലയത്തില്‍ താമസിക്കും.
നാളെ രാവിലെ 10ന് തൃപ്രയാറില്‍ നടക്കുന്ന ഫിഷര്‍മാന്‍ പാര്‍ലമെന്റില്‍ രാഹുല്‍ ഗാന്ധി പങ്കെടുക്കും. ഉച്ചയോടെ കണ്ണൂരിലെത്തി മട്ടന്നൂരില്‍ കൊല്ലപ്പെട്ട ഷുഹൈബിന്റെ കുടുംബാംഗങ്ങളുമായി കൂടിക്കാഴ്ച നടത്തും. തുടര്‍ന്ന് കാസര്‍കോട് പെരിയയില്‍ കൊല്ലപ്പെട്ട യൂത്ത് കോണ്‍ഗ്രസ് പ്രവര്‍ത്തകരായ കൃപേഷിന്റയും ശരത്ത് ലാലിന്റെയും വീടുകള്‍ സന്ദര്‍ശിക്കും.
നാളെ കോഴിക്കോട് കടപ്പുറത്ത് നടക്കുന്ന ജനമഹാറാലിയുടെ ഉദ്ഘാടനവും രാഹുല്‍ഗാന്ധി നിര്‍വഹിക്കും.ഇതോടെ കോണ്‍ഗ്രസിന്റെ തെരഞ്ഞെടുപ്പ് പ്രചാരണത്തിന് ഔദ്യോഗികമായി തുടക്കം കുറിക്കും.
കോണ്‍ഗ്രസിലെ സ്ഥാനാര്‍ത്ഥി നിര്‍ണ്ണയം ഇതുവരെ പൂര്‍ത്തിയായിട്ടില്ല.എങ്കിലും സിപിഎം ഉള്‍പ്പെടെ പ്രചരണം തുടങ്ങിക്കഴിഞ്ഞ സാഹചര്യത്തില്‍ കോണ്‍ഗ്രസിനും
പിന്നോട്ടു നില്‍ക്കാനാവില്ല.
