വൈക്കം: പ്രശസ്ത ഗായിക വൈക്കം വിജയലക്ഷ്മി വിവാഹിതയായി.രാവിലെ 10.50ന് വൈക്കം മഹാദേവക്ഷേത്രത്തില്‍ വച്ച് അനൂപ് വിജയലക്ഷ്മിയുടെ കഴുത്തില്‍ മിന്നുചാര്‍ത്തി.പാലാ പുലിയന്നൂര്‍ കൊച്ചൊഴുകയില്‍ നാരായണന്‍നായരുടേയും ലൈലാ കുമാരിയുടേയും മകനായ അനൂപ് മിമിക്രി കലാകാരനാണ്‌. വിജയലക്ഷ്മിയുടെ ആരാധകന്‍കൂടിയാണ് അനൂപ്.വൈക്കത്ത് ഉഷാ നിവാസില്‍ വി.മുരളീധരന്റേയും വിമലയുടേയും ഏക മകളായ വിജയ ലക്ഷ്മി ചലച്ചിത്രഗാനരംഗത്ത് തന്റേതായ ഇടം നേടിയെടുത്ത കലാകാരിയാണ്.
സെല്ലുലോയിഡ് എന്ന ചിത്രത്തിലെ ‘കാറ്റേ കാറ്റേ’ എന്ന ഗാനത്തിലൂടെയാണ് വിജയലക്ഷ്മി ചലച്ചിത്രസംഗീതലോകത്തെത്തിയത്. നടന്‍ എന്ന ചിത്രത്തിലെ ‘ഒറ്റയ്ക്കു പാടുന്ന പൂങ്കുയിലേ’ എന്ന ഗാനത്തിന് മികച്ച ഗായികയ്ക്കുള്ള സംസ്ഥാന അവാര്‍ഡും വിജയലക്ഷ്മിക്കു ലഭിച്ചു.
മലയാളം കൂടാതെ തമിഴ്,തെലുങ്ക് ഉള്‍പ്പെടെ മിക്ക ദക്ഷിണേന്ത്യന്‍ ഭാഷകളിലും ഇതിനോടകം വിജയലക്ഷ്മി പാടിക്കഴിഞ്ഞു.തുടര്‍ച്ചയായി ഗായത്രിവീണ വായിച്ച് റെക്കോര്‍ഡിട്ട ഗായിക കൂടിയാണ് വിജയലക്ഷ്മി.
