കോട്ടയം:ഗ്വാളിയോര്‍ രൂപത ബിഷപ്പ് മാര്‍ തോമസ് തെന്നാട്ട് വാഹനാപകടത്തില്‍ മരിച്ചു.65 വയസ്സായിരുന്നു.രൂപതയുടെ കീഴിലുള്ള സ്‌കൂളിലെ വാര്‍ഷികാഘോഷ പരിപാടിയില്‍ പങ്കെടുത്തശേഷം മടങ്ങുമ്പോള്‍ ബിഷപ്പ് സഞ്ചരിച്ച കാര്‍ അപകടത്തില്‍പ്പെടുകയായിരുന്നു.ഉടന്‍ തന്നെ ഗ്വാളിയോര്‍ സെന്റ് ജോസഫ് ഹോസ്പിറ്റലില്‍ എത്തിച്ചെങ്കിലും ജീവന്‍ രക്ഷിക്കാനായില്ല. സംസ്‌കാരച്ചടങ്ങുകള്‍ പിന്നീട്.
നാഗ്പൂരിലെ സെന്റ് പയസ് പള്ളിയില്‍ പുരോഹിതനായിരിക്കുമ്പോഴാണ് 2016 ഒക്ടോബര്‍ 18ന് ഫ്രാന്‍സിസ് മാര്‍പാപ്പ ഇദ്ദേഹത്തെ ഗ്വാളിയോര്‍ രൂപത ബിഷപ്പായി നിയമിച്ചത്.കോട്ടയം അതിരൂപതാംഗവും ഏറ്റുമാനൂര്‍ സെന്റ് ജോസഫ് ഇടവകാംഗവുമാണ്.1953 നവംബര്‍ 26 ന് കോട്ടയം ജില്ലയിലെ കൂടല്ലൂരിലാണ് ജനനം.1969 ലാണ് അദ്ദേഹം വൈദികനാവാന്‍ തിരുവനന്തപുരത്തെ സെമിനാരിയില്‍ ചേര്‍ന്നത്. ഏലിയാമ്മ,മേരി, ജോസഫ്, ക്ലാരമ്മ എന്നിവരാണ് സഹോദരങ്ങള്‍.
