ബെംഗളൂരു:ചന്ദ്രയാന്‍ ദൗത്യം അവസാനഘട്ടത്തില്‍ പരാജയപ്പെട്ടതില്‍ നിരാശപ്പെട്ട് ശാസ്ത്രജ്ഞരെ സമാധാനിപ്പിച്ച് പ്രധാനമന്ത്രി നരേന്ദ്രമോദി. തിരിച്ചടിയില്‍ തളരരുതെന്നും ഏറ്റവും മികച്ച അവസരങ്ങള്‍ ഇനിയും വരാനുണ്ടെന്നും രാജ്യത്തെ അഭിസംബോധന ചെയ്തുകൊണ്ട് പ്രധാനമന്ത്രി പറഞ്ഞു. ശാസ്ത്രജ്ഞര്‍ രാജ്യത്തിനായി ജീവിതം ഉഴിഞ്ഞ് വച്ചവരാണ്. ലക്ഷ്യത്തില്‍ നിന്ന് ഒരിക്കലും പിന്നോട്ട് പോകരുതെന്നും പരിശ്രമങ്ങള്‍ തുടരണമെന്നും മോദി പറഞ്ഞു.ദൗത്യം അവസാന ഘട്ടത്തില്‍ പരാജയപ്പെട്ട വൈകാരികമായി പ്രതികരിച്ച ഐഎസ്ആര്‍ഒ ചെയര്‍മാന്‍ കെ ശിവനെ പ്രധാനമന്ത്രി നരേന്ദ്രമോദി ആശ്വസിപ്പിച്ചു.
ഇന്ന് പുലര്‍ച്ചെ ചന്ദ്രോപരിതലത്തിലേക്ക് ഇറങ്ങിയ വിക്രം ലാന്‍ഡറുമായുള്ള ആശയവിനിമയം തകരാറിലാവുകയായിരുന്നു. 2.1 കിലോമീറ്റര്‍ വരെ എല്ലാം വളരെ കൃത്യമായാണ് നീങ്ങിയെങ്കിലും തുടര്‍ന്ന് ലാന്‍ഡറില്‍ നിന്നുള്ള സിഗ്‌നലുകള്‍ നഷ്ടമാവുകയായിരുന്നുവെന്ന് ഐ എസ്ആര്‍ഒ വ്യക്തമാക്കി. ചന്ദ്രയാന്‍ 2 ചന്ദ്രനെ തൊടുന്ന മുഹൂര്‍ത്തത്തിനു സാക്ഷ്യം വഹിക്കാനാണ് പ്രധാനമന്ത്രി ഐഎസ്ആര്‍ഒ ആസ്ഥാനത്തെത്തിയത്.
