തിരുവനന്തപുരം:തിരുവനന്തപുരത്ത് സ്‌കൂള്‍ബസ് കടയിലേക്ക് ഇടിച്ചുകയറി പത്തോളം കുട്ടികള്‍ക്ക് പരിക്ക്.ആരുടേയും പരിക്ക് ഗുരുതരമല്ല.വൈകീട്ട് അഞ്ചോടെ മണ്ണന്തലയ്ക്ക് സമീപം കേരളാദിത്യപുരത്താണ് അപകടമുണ്ടായത്.നിയന്ത്രണംവിട്ട ബസ് ഇടിച്ച് സ്‌കൂട്ടര്‍ യാത്രക്കാരായ രണ്ടുപേര്‍ക്ക് ഗുരുതരമായി പരിക്കേറ്റു.ബസില്‍ കുടുങ്ങി കിടന്ന ഡ്രൈവര്‍ക്കും സാരമായ പരിക്കേറ്റിട്ടുണ്ട്.പരിക്കേറ്റവരെ തിരുവനന്തപുരം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.
നാലാഞ്ചിറ സര്‍വോദയ വിദ്യാലയത്തിന്റെ ബസാണ് അപകടത്തില്‍പ്പെട്ടത്.ബസ് ഇടിച്ചു കയറുമ്പോള്‍ കടയിലുണ്ടായിരുന്നവര്‍ ഓടി രക്ഷപ്പെട്ടു.കട പൂര്‍ണ്ണമായും തകര്‍ന്നു.ബസിന്റെ ബ്രേക്കിനു തകരാറു സംഭവിച്ചതാണ് അപകടത്തിനു കാരണമെന്ന് പറയപ്പെടുന്നു.മണ്ണന്തല പോലീസും ഫയര്‍ഫോഴ്സും നാട്ടുകാരും ചേര്‍ന്നാണ് രക്ഷാപ്രവര്‍ത്തനം നടത്തിയത്.
