തൃശൂര്‍:പ്രമുഖ നടന്‍ സണ്ണി വെയ്ന്‍ വിവാഹിതനായി. ചൊവ്വാഴ്ച ഗുരുവായൂര്‍ ക്ഷേത്രത്തില്‍ നടന്ന ലളിതമായ ചടങ്ങില്‍ സണ്ണി ബാല്യകാല സുഹൃത്തായ രഞ്ജിനിയുടെ കഴുത്തില്‍ താലി ചാര്‍ത്തി.കോഴിക്കോട് സ്വദേശിനിയാണ് രഞ്ജിനി. സണ്ണി വെയ്ന്‍ ഫേസ്ബുക്കിലൂടയൊണ് വിവാഹചിത്രങ്ങള്‍ പങ്കുവെച്ചത്.
അടുത്ത സൃഹൃത്തുക്കളും ബന്ധുക്കളും മാത്രമാണ് വിവാഹച്ചടങ്ങില്‍ പങ്കെടുത്തത്. സിനിമയിലെ സഹപ്രവര്‍ത്തകര്‍ക്കും സുഹൃത്തുക്കള്‍ക്കുമായി പിന്നീട് വിവാഹ സല്‍ക്കാരം നടത്തും.
സെക്കന്റ് ഷോ എന്ന ചിത്രത്തിലൂടെ സിനിമാരംഗത്ത് അരങ്ങേറ്റം കുറിച്ച സണ്ണി വെയ്ന്‍ മുപ്പത്തിരണ്ടോളം സിനിമകളില്‍ നായകനായും സഹനടനായും വില്ലനായും വേഷമിട്ടിട്ടുണ്ട്.അടുത്ത കാലത്തിറങ്ങിയ സൂപ്പര്‍ഹിറ്റ് ചിത്രമായ കായംകുളം കൊച്ചുണ്ണിയിലെ വില്ലന്‍ വേഷം സണ്ണി വെയ്ന്‍ ഗംഭീരമാക്കിയിരുന്നു.
