വി.കെ.പ്രകാശ് സംവിധാനം ചെയ്യുന്ന ‘ഒരുത്തി’ എന്ന സിനിമയിലൂടെ നവ്യ വീണ്ടും അഭിനയരംഗത്തേക്ക് തിരിച്ചെത്തുകയാണ്. സിനിമയുടെ ഫസ്റ്റ് ലുക്ക് പോസ്റ്റര്‍ കഴിഞ്ഞ ദിവസം പുറത്തിറങ്ങിയിരുന്നു. മമ്മൂട്ടിയും മഞ്ജു വാര്യരും ചേര്‍ന്നാണ് ഒരുത്തിയുടെ ഫസ്റ്റ് ലുക്ക് പോസ്റ്റര്‍ പുറത്തുവിട്ടിരിക്കുന്നത്. ശക്തമാര്‍ന്നൊരു സ്ത്രീ കഥാപാത്രത്തെയാണ് ചിത്രത്തില്‍ നവ്യ അവതരിപ്പിക്കുന്നത്. എസ്.സുരേഷ് ബാബു തിരക്കഥയെഴുതുന്ന ചിത്രത്തില്‍ വിനായകനും പ്രധാന വേഷം അവതരിപ്പിക്കുന്നുണ്ട്. ഇഷ്ടം എന്ന ചിത്രത്തിലൂടെ സിനിമാരംഗത്ത് ചുവടുറപ്പിച്ച നവ്യ, നന്ദനം എന്ന ചിത്രത്തിലൂടെയാണ് മലയാളികളുടെ പ്രിയപ്പെട്ടവളായത്. നവ്യക്ക് സംസ്ഥാന ചലച്ചിത്ര അവാര്‍ഡ് നേടിക്കൊടുത്ത ബാലാമണി എന്ന കഥാപാത്രത്തെ ഒരുത്തിയുടെ ഫസ്റ്റ്‌ലുക്ക് അനൗണ്‍സ്‌മെന്റ് വീഡിയോയിലൂടെ തിരികെ കൊണ്ടുവന്ന ഒരുത്തി ടീമിന്റെ ശ്രമം സമൂഹമാധ്യമങ്ങളില്‍ ഏറെ ശ്രദ്ധ നേടിയിരുന്നു. ദി ഫയര്‍ ഇന്‍ യു എന്ന ടാഗ് ലൈനോടുകൂടിയാണ് ഒരുത്തിയുടെ ഫസ്റ്റ് ലുക്ക് പുറത്ത് വന്നിരിക്കുന്നത്. ഇത്തരമൊരു സിനിമയിലൂടെ തിരിച്ചുവരാന്‍ സാധിച്ചതില്‍ സന്തോഷമുണ്ടെന്നും നവ്യ പറഞ്ഞു. ഒരു സ്ത്രീയുടെ ജീവിതത്തില്‍ മൂന്ന് ദിവസത്തിലുണ്ടാകുന്ന അപ്രതീക്ഷിത സംഭവ വികാസങ്ങളാണ് സിനിമയില്‍ കാണിക്കുന്നത്. മഞ്ജു വാര്യരുടെ തിരിച്ചുവരവ് തനിക്ക് പ്രചോദനമായെന്നും നവ്യ പറഞ്ഞു.
