മമ്മൂട്ടിയുടെ കരിയറിലെ മികച്ചതും, വ്യത്യസ്തവുമായ കഥാപാത്രങ്ങളിലൊന്നായിരുന്നു ബിഗ്ബിയിലെ ബിലാല്‍ ജോണ്‍ കുരിശിങ്കല്‍. ഈ ചിത്രത്തിന് തിയറ്ററികളിനെക്കാള്‍ മികച്ച സ്വീകരണം ലഭിച്ചത് ഡിവിഡി ഇറങ്ങിയതിനു ശേഷമാണ്. ബിലാലിന്റെ ഡയലോഗും, മാനറിസവുമൊക്കെ ഇന്നും ആരാധക മനസ്സില്‍ നിറഞ്ഞു നില്‍ക്കുന്നുണ്ട്. ബിഗ്ബിക്ക് രണ്ടാം ഭാഗം വരുകയാണ്. സിനിമാലോകവും പ്രേക്ഷകരും ഒരു പോലെ കാത്തിരിക്കുന്ന മമ്മൂട്ടി ചിത്രങ്ങളിലൊന്നാണ് ബിലാല്‍. സിനിമയുടെ ചിത്രീകരണം ഫെബ്രുവരിയില്‍ ആരംഭിക്കുമെന്ന റിപ്പോര്‍ട്ടുകളാണ് ഇപ്പോള്‍ ലഭിച്ചിരിക്കുന്നത്. പ്രീപ്രൊഡക്ഷന്‍ ജോലികള്‍ അവസാനഘട്ടത്തിലേക്ക് കടന്നിരിക്കുകയാണെന്നും ഫെബ്രുവരി പകുതിയോടെ സിനിമയുടെ ചിത്രീകരണം തുടങ്ങുമെന്നുള്ള വിവരങ്ങളാണ് ഇപ്പോള്‍ പുറത്തു വന്നിട്ടുള്ളത്. നിലവില്‍ ഷൂട്ടിംഗ് നടക്കുന്ന ചിത്രങ്ങളുടെ തിരക്കുകളെല്ലാം തീര്‍ത്തതിനു ശേഷം മമ്മൂട്ടിയും ചിത്രത്തില്‍ ജോയിന്‍ ചെയ്യും. 2020 പകുതിയോടെ സിനിമ റിലീസ് ചെയ്യാനാണ് അണിയറ പ്രവര്‍ത്തകര്‍ ഉദ്ദേശിക്കുന്നത്. ഫോര്‍ബ്രദേഴ്‌സ് എന്ന ഹോളിവുഡ് സിനിമയെ അടിസ്ഥാനമാക്കിയായിരുന്നു അമല്‍നീരദ് ബിഗ്ബി ഒരുക്കിയത്. ഫഹദ് ഫാസിലും ചിത്രത്തില്‍ പ്രധാന വേഷത്തിലെത്തുന്നുണ്ട്. ബിലാല്‍ ജോണ്‍ കുരിശിങ്കലിന്റെ രണ്ടാം വരവിനായുള്ള കാത്തിരിപ്പിലാണ് ആരാധകരും.
