മുംബൈ:കഴിഞ്ഞ ദിവസം കോണ്‍ഗ്രസില്‍ അംഗമായ ബോളിവുഡ് നടി ഊര്‍മിള മഡോന്ദ്കര്‍ മുംബൈ നോര്‍ത്തില്‍ നിന്നും കോണ്‍ഗ്രസ് സ്ഥാനാര്‍ത്ഥിയായി മല്‍സരിക്കും.ബിജെപി സ്ഥാനാര്‍ത്ഥി ഗോപാല്‍ ഷെട്ടിയാണ് ഊര്‍മിളയുടെ എതിരാളി.
കഴിഞ്ഞദിവസം കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയുമായി കൂടിക്കാഴ്ച നടത്തിയശേഷം ഡല്‍ഹിയില്‍ നടത്തിയ വാര്‍ത്താസമ്മേളനത്തിലാണ് കോണ്‍ഗ്രസില്‍ ചേര്‍ന്നതായി ഉര്‍മ്മിള അറിയിച്ചത്.
മഹാത്മാ ഗാന്ധിയുടെയും ജവഹര്‍ലാല്‍ നെഹ്റുവിന്റെയും സര്‍ദാര്‍ പട്ടേലിന്റെയും വീക്ഷണങ്ങളിലൂടെ ചിന്തിക്കുന്ന രാഷ്ട്രീയ പാരമ്പര്യമുള്ള ഒരു കുടുംബമാണ് തന്റേതെന്ന് ഊര്‍മ്മിള പറഞ്ഞു. ചെറുപ്പം മുതല്‍ തന്നെ സാമൂഹിക അവബോധത്തോടെയാണ് വളര്‍ന്നു വന്നതെന്നും ഊര്‍മിള മാധ്യമപ്രവര്‍ത്തകരോട് പറഞ്ഞു.
തൊണ്ണൂറുകളില്‍ ബോളിവുഡ് സിനിമയുടെ ഹരമായിരുന്ന ഊര്‍മ്മിള രാംഗോപാല്‍ വര്‍മ്മയുടെ ചിത്രങ്ങളിലൂടെ യാണ് പ്രശസ്തിയിലെത്തിയത്.രംഗീല ഉര്‍മ്മിളയുടെ എക്കാലത്തേയും ഹിറ്റായി. കമലഹാസന്‍ നായകനായ ചാണക്യന്‍, മോഹന്‍ലാലിനൊപ്പം തച്ചോളി വര്‍ഗീസ് ചേകവര്‍ എന്നീ ചിത്രങ്ങളില്‍ ഊര്‍മ്മിള നായിക കഥാപാത്രത്തെ അവതരിപ്പിച്ചു.
