മുംബൈ:ബോളിവുഡ് നടി റിത ഭാദുരി (62)അന്തരിച്ചു. വൃക്ക സംബന്ധമായ രോഗത്തിന് ചികില്‍സയിലിരിക്കെ ഇന്നലെ രാത്രിയോടെയായിരുന്നു അന്ത്യം.സംസ്‌കാരം ഇന്ന് ഉച്ചക്ക് അന്ധേരി ഈസ്റ്റ് ശ്മശാനത്തില്‍ നടക്കും.
കെ.എസ്.സേതുമാധവന്‍ സംവിധാനം ചെയ്ത കന്യാകുമാരി എന്ന മലയാള ചിത്രത്തില്‍ കമലഹാസന്റെ നായികയായി റിത ഭാദുരി അഭിനയിച്ചിരുന്നു.
പൂനെ ഫിലിം ഇന്‍സ്റ്റിറ്റ്യൂട്ടില്‍ നിന്നും 1973-ല്‍ ബിരുദം നേടിയ റീത ഭാദുരി 1968 -ല്‍ ‘തേരി തല്‍ഷാന്‍ മേന്‍’ എന്ന ചിത്രത്തിലൂടെയാണ് അഭിനയരംഗത്തെത്തുന്നത്.ജൂലി,ബേട്ടാ,കഫി ഹാം കഫി നാ,രാജ,വിരാസത്,ഹീറോ നമ്പര്‍ വണ്‍,ക്യാ കഹ്നാ എന്നിവയടക്കം 70ലേറെ സിനിമകളില്‍ റീത ഭാദുരി പ്രതിഭ തെളിയിച്ചു.കൂടാതെ നിരവധി ടിവി സീരിയലുകളിലും അവര്‍ അഭിനയിച്ചു.അഭിഷേക് ജയിന്‍ സംവിധാനം ചെയ്ത ‘കെവി റിതേ ജയിഷ്’ എന്ന ഗുജറാത്തി സിനിമയിലാണ് റിതാ ഭാദുരി അവസാനമായി വേഷമിട്ടത്.
