നിപ്പ വൈറസ് രോഗം പ്രമേയമാക്കി ആഷിക് അബു സംവിധാനം ചെയ്യുന്ന ‘വൈറസ്’ എന്ന ചിത്രത്തിന്റെ ട്രെയിലര്‍ റിലീസ് ചെയ്തു. നിപ്പ എന്ന മഹാരോഗം മൂലം ജനങ്ങള്‍ അനുഭവിച്ച ദുരിതങ്ങളും, കഷ്ടപ്പാടുകളും അവര്‍ അതിനെ എങ്ങനെ അതിജീവിച്ചുവെന്നതുമാണ് ഇതിന്റെ പ്രമേയം. ചലച്ചിത്ര ആരാധകര്‍ എറെ നാളായി ആകാംക്ഷയോടെ കാത്തിരിക്കുന്ന ചിത്രമാണിത്. ദോഹയിലെ സ്‌പോര്‍ട്‌സ് സ്‌റ്റേഡിയത്തില്‍ നടന്ന ചടങ്ങില്‍ ചിത്രത്തിലെ പ്രധാന കഥാപാത്രങ്ങളെ അവതരിപ്പിച്ചവരും, അണിയറ പ്രവര്‍ത്തകരും ചേര്‍ന്നാണ് ട്രെയിലര്‍ പുറത്തിറക്കിയത്. രേവതി, ആസിഫ് അലി, ടൊവിനോ, കുഞ്ചാക്കോ ബോബന്‍, റിമ, പാര്‍വതി, രമ്യാ നമ്പീശന്‍, സൗബിന്‍, ദിലീഷ് പോത്തന്‍, ചെമ്പന്‍ വിനോദ് എന്നിവര്‍ പ്രമുഖ കഥാപാത്രങ്ങളെ അവതരിപ്പിക്കുന്നു. രാജീവ് രവിയാണ് ക്യാമറ. അതേ സമയം ഒട്ടനവധി സാങ്കേതിക തടസ്സങ്ങള്‍ക്ക് ശേഷമാണ് ഈ സിനിമയുടെ ട്രെയിലര്‍ പുറത്തിറങ്ങുന്നത്. വൈറസ് എന്ന പേരും ചിത്രത്തിന്റെ കഥയും തന്റേതാണെന്ന് കാണിച്ച് ഉദയ് അനന്തന്റെ പരാതിയിന്മേല്‍ വൈറസിന്റെ നിര്‍മ്മാണ പ്രവര്‍ത്തനങ്ങള്‍ താല്‍ക്കാലികമായി നിര്‍ത്തി വയ്ക്കപ്പെട്ടിരുന്നു. എന്നാല്‍ അതിനെയെല്ലെം അതിജീവിച്ചുകൊണ്ട് വൈറസ് എന്ന ചിത്രത്തിന്റെ ട്രെയിലര്‍ പുറത്തിറങ്ങിയിരിക്കുകയാണ്. ഇനി ചിത്രത്തിനായുള്ള കാത്തിരിപ്പിലാണ് ആരാധകര്‍.
