ചലച്ചിത്രപ്രേമികള്‍ ഏറെ ആകാംഷയോടെ കാത്തിരിക്കുന്ന മോഹന്‍ലാല്‍ ചിത്രം ഒടിയനിലെ ആദ്യ വീഡിയോ ഗാനവും നവ മാധ്യമങ്ങളില്‍ സൂപ്പര്‍ ഹിറ്റായി. ശ്രേയ ഘോഷാല്‍ പാടിയ’മാനം തുടുക്കണ് നേരം വെളുക്കണ്’…എന്ന് തുടങ്ങുന്ന ഗാനം റിലീസ് ചെയ്ത്അരമണിക്കുറിനുള്ളില്‍
ഒരുലക്ഷം പേരാണ് കണ്ടത്. മോഹന്‍ലാല്‍ ഫേസ്ബുക് പേജിലൂടെയാണ് വീഡിയോ പുറത്തുവിട്ടത്.നേരത്തേ പുറത്തിറക്കിയ കൊണ്ടോരാം കൊണ്ടോരാം എന്ന ഗാനത്തിന്റെ ലിറിക്കല്‍ വീഡിയോയും സമൂഹമാധ്യമങ്ങളില്‍ തരംഗമായി മാറിയിരുന്നു.
മോഹന്‍ലാലും മഞ്ജുവാര്യരും സന അല്‍ത്താഫുമാണ്
ഗ്രാമീണപശ്ചാത്തലത്തിന്റെ ദൃശ്യഭംഗിയോടെ ചിത്രീകരിച്ച ഗാനത്തില്‍ പ്രത്യക്ഷപ്പെടുന്നത്.റഫീക്ക് അഹമ്മദിന്റെ വരികള്‍ക്ക് സംഗീതം എം ജയചന്ദ്രന്‍ സംഗീതം പകര്‍ന്നിരിക്കുന്നു.
മോഹന്‍ലാല്‍ ആരാധകര്‍ ഏറെ പ്രതീക്ഷയോടെ,അതിലേറെ ആകാംഷയോടെ കാത്തിരിക്കുന്ന ‘ഒടിയന്‍’ഇൗ മാസം 14 ന് തീയേറ്ററുകളിലെത്തും. 30 മുതല്‍ 65 വയസ് വരെയുള്ള കഥാപാത്രങ്ങളെയാണ് മോഹന്‍ലാല്‍ മാണിക്യന്‍ എന്ന വേഷത്തിലൂടെ അവതരിപ്പിക്കുന്നത്. ഇരുട്ടിന്റെ രാജാവായ ഒടിയനിലേക്കുള്ള മോഹന്‍ലാലിന്റെ രൂപമാറ്റമാണ് ചിത്രത്തിന്റെ ഏറ്റവും വലിയ ആകര്‍ഷണം.
ശ്രീകുമാര്‍ മേനോന്‍ സംവിധാനം ചെയ്യുന്ന ചിത്രത്തിന്റെ ആക്ഷന്‍ രംഗങ്ങള്‍ ചെയ്യുന്നത് പുലിമുരുകനിലൂടെ മലയാളികള്‍ക്ക് പരിചിതനായ പീറ്റര്‍ ഹെയ്‌നാണ്.ആന്റണി പെരുമ്പാവൂരാണ് ചിത്രം നിര്‍മ്മിക്കുന്നത്. നരേന്‍,സിദ്ദിഖ്,ഇന്നസെന്റ്, എന്നിവരും ചിത്രത്തിലുണ്ട്.
