തൃശ്ശൂര്‍: മുഖം മൂടി സംഘം തട്ടിക്കൊണ്ടുപോയ യുവ സംവിധായകന്‍ നിഷാദ് ഹസനെ കണ്ടെത്തി. തൃശുര്‍ കൊടകരയില്‍ നിന്നുമാണ് നിഷാദിനെ കണ്ടെത്തിയത്. തട്ടിക്കൊണ്ടുപോയ സംഘത്തിന്റെ പിടിയില്‍ നിന്നും സാഹസികമായി രക്ഷപ്പെട്ടുവെന്നാണ് നിഷാദ് പറയുന്നത്. നിഷാദ് ഇപ്പോള്‍ ആശുപത്രിയില്‍ ചികില്‍സയിലാണ്.
അതേസമയം തട്ടിക്കൊണ്ടുപോകല്‍ പരാതിയില്‍ കൂടുതല്‍ അന്വേഷണം നടത്താനാണ് പോലീസ് നീക്കം.നിഷാദ് ഹസനോട് രാവിലെ പേരാമംഗലം സ്റ്റേഷനില്‍ ഹാജരാകാന്‍ പൊലീസ് ആവശ്യപ്പെട്ടിട്ടുണ്ട്.
ബുധനാഴ്ച ഭാര്യയോടൊപ്പം ഗുരുവായൂരിലേക്ക് കാറില്‍ പോകുമ്പോള്‍ പാവറട്ടിയില്‍ വെച്ച് മുഖം മൂടി സംഘം വാഹനം തടഞ്ഞ് ആക്രമിച്ച് നിഷാദിനെ തട്ടിക്കൊണ്ടുപോയതെന്നാണ് ഭാര്യയുടെ പരാതി. ആക്രമണത്തിനിടെ പരുക്കേറ്റ നിഷാദിന്റെ ഭാര്യ തൃശൂരിലെ സ്വകാര്യ ആശുപത്രിയില്‍ ചികിത്സയിലാണ്.
‘വിപ്ലവം ജയിക്കാനുള്ളതാണ്’ എന്ന സിനിമയുടെ സംവിധായകനാണ് നിഷാദ് ഹസന്‍.സിനിമയുടെ മുന്‍ നിര്‍മ്മാതാവ് സി ആര്‍ രണദേവിനെയാണ് സംശയമെന്ന് ഭാര്യ പറഞ്ഞിരുന്നു.
