ന്യൂഡല്‍ഹി:വിമാനത്തില്‍ പുകവലിക്കുന്നത് തടഞ്ഞ എയര്‍ഹോസ്റ്റസിനോട് അപമര്യാദയായി പെരുമാറിയ കോട്ടയം സ്വദേശി അറസ്റ്റില്‍.അബ്ദുല്‍ ഷാഹിദ് ശംസുദ്ദീനെയാണ് ഡല്‍ഹി പോലീസ് അറസ്റ്റ് ചെയ്തത്.ജിദ്ദയില്‍ നിന്നും ഡെല്‍ഹിയിലേക്ക് പോവുകയായിരുന്ന സൗദി എയര്‍ലൈന്‍സിലാണ് സംഭവം.
വിമാനത്തിനുള്ളില്‍ ഇയാള്‍ സിഗരറ്റ് കത്തിക്കാന്‍ തുടങ്ങിയപ്പോള്‍ തടഞ്ഞ എയര്‍ഹോസ്റ്റസിനോട് ഇയാള്‍ അപമര്യാദയായി സംസാരിച്ചു.തുടര്‍ന്ന് എയര്‍ഹോസ്റ്റസ് മറ്റു ജീവനക്കാരെ വിളിക്കാന്‍ തുടങ്ങുമ്പോള്‍ ഇയാള്‍ പാന്റിന്റെ സിപ്പഴിച്ചു കാണിച്ചെന്നാണ് പരാതി.
ഡല്‍ഹി വിമാനത്താവളത്തില്‍ എത്തിയ ഉടന്‍ വിമാനത്തിലെ ജീവനക്കാര്‍ എയര്‍പോര്‍ട്ട് ഓപ്പറേഷന്‍സ് കണ്‍ട്രോള്‍ സെന്ററിനെയും തുടര്‍ന്ന് സിഐഎസ്എഫിനെയും വിവരം അറിയിച്ചു. തുടര്‍ന്ന് ഇയാളെ സുരക്ഷാ ഉദ്യോഗസ്ഥര്‍ കസ്റ്റഡിയിലെടുത്ത് ഡല്‍ഹി പോലീസിന് കൈമാറി.
ഐപിസി സെക്ഷന്‍ 354, 509 വകുപ്പുകള്‍ പ്രകാരമാണ് അബ്ദുല്‍ ഷാഹിദിനെതിരെ കേസെടുത്തിരിക്കുന്നത്.ഇലക്ട്രീഷ്യനായ അബ്ദുല്‍ ഷാഹിദ് വര്‍ക്ക് വിസയില്‍ കുറച്ച് മാസങ്ങള്‍ക്ക് മുമ്പാണ് സൗദിയില്‍ എത്തിയതെന്ന് പൊലീസ് പറഞ്ഞു.
