അങ്കമാലി:വൈദ്യുതി കണക്ഷന്‍ നല്‍കാത്തതിന്റെ പേരില്‍ മരത്തില്‍ കയറി ആത്മഹത്യാഭീഷണിയുമായി വ്യവസായി.അങ്കമാലിയില്‍ ന്യു ഇയര്‍ ചിട്ടിക്കമ്പനി നടത്തുന്ന പ്രസാദാണ് കറുകുറ്റി കെ.എസ്.ഇ.ബി ഓഫീസിന് മുമ്പിലുള്ള മരത്തില്‍ കയറിയിരിക്കുന്നത്. ജില്ലാ കലക്ടര്‍ എത്തി അനുകൂല തീരുമാനം ഉണ്ടാക്കാതെ പിന്‍മാറില്ലെന്നാണ് പ്രസാദ് പറയുന്നത്. ഇയാളെ അനുനയിപ്പിച്ചു താഴെയിറക്കാനുള്ള ശ്രമങ്ങള്‍ തുടരുകയാണ്.പോലീസും ഫയര്‍ഫോഴ്‌സും സ്ഥലത്തുണ്ട്.
പ്രസാദിന്റെ സ്ഥാപനത്തിന്റെ പ്ലാനില്‍ പിഴവ് കണ്ടെത്തിയതിനാലാണ് വൈദ്യുതി കണക്ഷന്‍ നല്‍കാത്തതെന്ന് കെഎസ്ഇബി പറയുന്നു.പ്ലാനിലെ അപാകതക്ക് പിഴ ചുമത്തിയ 4.5ലക്ഷം രൂപ ഇതുവരെ അടച്ചിട്ടില്ല. റവന്യു റിക്കവറി നടപടികള്‍ക്കിടെയാണ് ആത്മഹത്യ ഭീഷണിയെന്നും ഇത് സമ്മര്‍ദ്ദ തന്ത്രമാണെന്നുമാണ് കെഎസ്ഇബി അധികൃതര്‍ പറയുന്നത്.
