സന്നിധാനം:മണ്ഡലകാലത്ത് ശബരിമലയില്‍ പൊലീസിന് ഡ്രസ് കോഡ് നിര്‍ബന്ധമാക്കി.18ാം പടിക്ക് താഴെ ജോലിചെയ്യുന്ന പൊലീസുകാര്‍ക്കാണ് യൂണിഫോമും തൊപ്പിയും ബെല്‍റ്റും നിര്‍ബന്ധമാക്കിയത്.ഇതിനു പുറമെ നടപ്പന്തലില്‍ ഡ്യൂട്ടി ഉള്ള പൊലീസുകാരുടെ കയ്യില്‍ ലാത്തിയും ഷീല്‍ഡും വേണമെന്നും നിര്‍ദ്ദേശമുണ്ട്.ഐജി വിജയ് സാക്കറെയാണ് കര്‍ശന നിര്‍ദ്ദേശം നല്‍കിയത്.
സോപാനത്തും പതിനെട്ടാം പടിയിലും ഡ്യൂട്ടിയിലുള്ള പൊലീസുകാര്‍ക്ക് ഈ നിര്‍ദ്ദേശം ബാധകമല്ല.മുന്‍ കാലങ്ങളില്‍ ശബരിമല ഡ്യൂട്ടി ചെയ്യുന്ന പോലീസുകാര്‍ക്ക് ബല്‍റ്റും ഷൂസും തൊപ്പിയുമൊന്നും നിര്‍ബന്ധമാക്കിയിരുന്നില്ല. മണ്ഡലപൂജകള്‍ക്കായി ഇന്ന് വൈകിട്ട് ശബരിമല നട തുറക്കും. സ്ത്രീപ്രവേശനവിധിയുടെ പശ്ചാത്തലത്തില്‍ വന്‍ പോലീസ് സേനയെത്തന്നെ സന്നിധാനത്തും സമീപപ്രദേശങ്ങളിലും വിന്യസിച്ചുകഴിഞ്ഞു.അമ്പത് വയസ് കഴിഞ്ഞ വനിതാ പൊലീസ് സംഘത്തെയും സന്നിധാനത്ത് എത്തിച്ചിട്ടുണ്ട്. സുരക്ഷാസംവിധാനങ്ങള്‍ വിലയിരുത്താന്‍ ഡിജിപി ലോക്നാഥ് ബെഹ്റയും നിലയ്ക്കലില്‍ എത്തിയിട്ടുണ്ട്.
