ശബരിമല: പുതിയ ശബരിമല , മാളികപ്പുറം മേല്‍ശാന്തിമാരെ തെരഞ്ഞെടുത്തു. ശബരിമല മേല്‍ശാന്തിയായി മംഗലത്ത് അഴകത്ത് മന എ.വി. ഉണ്ണിക്കൃഷ്ണന്‍ നമ്പൂതിരിയും മാളികപ്പുറം മേല്‍ശാന്തിയായി വരിക്കം ഇല്ലത്ത് അനീഷ് നമ്പൂതിരിയും തെരഞ്ഞെടുക്കപ്പെട്ടു. ചൊവ്വാഴ്ച രാവിലെ ശബരിമല സന്നിധാനത്തും മാളികപ്പുറത്തുമായി നറുക്കെടുപ്പുകളിലൂടെയാണ് ഇരുവരെയും മേല്‍ശാന്തിമാരായി തെരഞ്ഞെടുത്തത്. വൃശ്ചികം ഒന്നു മുതല്‍ ഒരു വര്‍ഷത്തേക്കാണ് ഇവര്‍ മേല്‍ശാന്തിമാരായി ഉണ്ടാകുക.
തൃശൂര്‍ കൊടകര സ്വദേശിയാണ് എ.വി. ഉണ്ണികൃഷ്ണന്‍ നമ്പൂതിരി. തെരഞ്ഞെടുക്കപ്പെട്ട 12 പേരില്‍ നിന്നാണ് കൊല്ലം മൈനാകപ്പള്ളി സ്വദേശി അനീഷ് നമ്പൂതിരിയ്ക്ക് മാളികപ്പുറം മേല്‍ശാന്തിയാകാനുള്ള നറുക്ക് വീണത്.
ചൊവ്വാഴ്ച രാവിലെ ഉഷപൂജയ്ക്കുശേഷം ദേവസ്വം കമ്മീഷണറുടെ സാന്നിധ്യത്തിലാണ് പുതിയ മേല്‍ശാന്തിമാരുടെ തെരഞ്ഞെടുപ്പ് നടന്നത്. പന്തളം കൊട്ടാരത്തിലെ ഇളമുറക്കാരായ സൂര്യവര്‍മയും ഹൃദ്യ വര്‍മയുമാണ് മേല്‍ശാന്തിമാരുടെ നറുക്കെടുത്തത്.
