കോട്ടയം: 61ാമത് സംസ്ഥാന സ്‌കൂള്‍ കായികോത്സവത്തിന് തുടക്കമായി. പാലായില്‍ ഇന്നാരംഭിച്ച സംസ്ഥാന സ്‌കൂള്‍ കായികോത്സവത്തില്‍ ആദ്യ ദിനത്തിലെ മത്സരങ്ങള്‍ പൂര്‍ത്തിയായപ്പോള്‍ എറണാകുളം മുന്നില്‍. 50 പോയിന്റാണ് എറണാകുളം മസ്വന്തമാക്കിയത്. 32 പോയിന്റുമായി പാലക്കാട് തൊട്ടു പിന്നിലുണ്ട്.
പാലാ മുനി‍സിപ്പല്‍ സ്റ്റേഡിയത്തിലെ സിന്തറ്റിക് ട്രാക്കില്‍ രാവിലെ ഏഴിന് സീനിയര്‍ ആണ്‍കുട്ടികളുടെ 5000 മീറ്റര്‍ മത്സരത്തോടെയാണ് ട്രാക്കുണർന്നത്. സംസ്ഥാന സ്കൂൾ കായികമേളയിലെ ആദ്യ ദിനം 11 ഇനങ്ങൾ പൂർത്തിയായി. സ്കൂളുകളിൽ 13 പോയിന്റുള്ള കോതമംഗലം മാർ ബേസിലാണ് മുന്നിൽ. 9 പോയിന്റുള്ള പാലക്കാട് പറളി ഹൈസ്കൂൾ രണ്ടാം സ്ഥാനത്തുണ്ട്.
കായികോത്സവത്ത്തിന്റെ ആദ്യദിനത്തിൽ ദേശീയ റെക്കോർഡ് മറികടന്ന പ്രകടനത്തോടെ പി എൻ അജിത്തും അനുമോൾ തമ്പിയും താരങ്ങളായി. 3000 മീറ്ററിലാണ് അനുമോളുടെ നേട്ടമെങ്കിൽ അജിത് 5000 മീറ്ററിൽ മീറ്റ് റെക്കോർഡും മറികടന്നാണ് നേട്ടം സ്വന്തമാക്കിയത്.
