തിരുവനന്തപുരം:മാക്ഡവല്‍സ് കുപ്പിവെള്ളം സംസ്ഥാനത്ത് നിരോധിച്ചു. പരിശോധനയില്‍ ആവശ്യത്തില്‍ കൂടുതല്‍ സില്‍വറിന്റെ അംശം കണ്ടെത്തിയതിനെത്തുടര്‍ന്നാണ് ഭക്ഷ്യ സുരക്ഷ വകുപ്പ് മാക്ഡവല്‍സ് കുപ്പിവെള്ളം നിരോധിച്ചത്.സുരക്ഷ വകുപ്പിന്റെ ഔദ്യോഗിക ഫേസ്ബുക്ക് പേജായ ഫുഡ് സെഫ്റ്റി കേരള വഴിയാണ് വിവരം പുറത്തുവിട്ടത്.
ഇനി മാക്ഡവല്‍സ് കുപ്പിവെള്ളം വില്‍ക്കാനോ സൂക്ഷിക്കാനോ പാടില്ലെന്നും വിപണിയിലുള്ള മുഴുവന്‍ കുപ്പി വെള്ളവും ഉല്‍പ്പാദകര്‍ തിരിച്ചെടുക്കണമെന്നും ഭക്ഷ്യ സുരക്ഷാവകുപ്പ് നിര്‍ദേശിച്ചു. ഗുണമേന്‍മയില്ലാത്തതും വൃത്തിയില്ലാത്ത ഇടങ്ങളില്‍ നിന്നും ശേഖരിക്കുന്നതുമായ വെള്ളമാണ് മാക്ഡവല്‍സ് ഉള്‍പ്പെടെ പല കമ്പനികളും വിതരണം ചെയ്യുന്നതെന്നും പരിശോധനയില്‍ കണ്ടെത്തിയിട്ടുണ്ട്.
