ന്യൂഡല്‍ഹി: സേലത്തേക്ക് പോകാനായി ഹാദിയ ഡല്‍ഹി വിമാനത്താവളത്തിലേക്ക് തിരിച്ചു. 1.20നുള്ള വിമാനത്തില്‍ കോയമ്പത്തൂരിലെത്തിച്ച ശേഷം റോഡ് മാര്‍ഗ്ഗമാണ് ഹാദിയ സേലത്തേക്ക് പോകുന്നത്. രാവിലെ ഹാദിയയെ മെഡിക്കല്‍ കോളേജിലെത്തിക്കാനുള്ള നടപടികള്‍ വേഗത്തിലാക്കാന്‍ കേരള ഹൗസ് അധികൃതര്‍ക്ക് മുഖ്യമന്ത്രിയുടെ നിര്‍ദേശം ലഭിച്ചിരുന്നു.
പൂര്‍ണ സ്വാതന്ത്ര്യം കിട്ടുമെന്നാണ് പ്രതീക്ഷയെന്ന് ഹാദിയ മാധ്യമ പ്രവര്‍ത്തകരോട് പറഞ്ഞു. ഭര്‍ത്താവിനൊപ്പപോവണമമെന്നാണ് ആഗ്രഹം എന്നും ഹാദിയ യാത്ര തിരിക്കും മുന്‍പ് പറഞ്ഞു. ഹാദിയ പഠിക്കുന്ന കോളേജിന് പൊലീസ് സംരക്ഷണം തേടുമെന്ന് ശിവരാജ് ഹോമിയോ കോളേജ് എംഡി കല്‍പന ശിവരാജ് പറഞ്ഞു. സേലം കലക്ടര്‍ക്കും കമ്മീഷണര്‍ക്കും എംഡി കത്ത് നല്‍കി. ഹാദിയയ്ക്ക് കോളേജിലും ഹോസ്റ്റലിലും എന്തു തരം സംരക്ഷണം നല്‍കണമെന്നത് ചര്‍ച്ച ചെയ്യാന്‍ കോളേജധികൃതര്‍ യോഗം ചേര്‍ന്നിരുന്നു.
