സനില്‍ കളത്തില്‍ കഥയെഴുതി സംവിധാനം ചെയ്യുന്ന ചിത്രത്തില്‍ ജയറാമിനൊപ്പമാണ് താരം അഭിനയിക്കുന്നത്. വിജയ് സേതുപതിയുടെ ആദ്യ മലയാള ചിത്രമാണിത്. ജയറാം നായകനായി അഭിനയിക്കുന്ന ചിത്രത്തില്‍ സിദ്ധാര്‍ത്ഥ് ശിവ, അജുവര്‍ഗ്ഗീസ്, സുധീര്‍ കരമന, കലാഭവന്‍ പ്രജോദ്, ജോയി മാത്യു, ടിനി ടോം, നരേന്‍, അനീഷ്, ഇടവേള ബാബു, റീന ബഷീര്‍, മല്ലിക സുകുമാരന്‍, ലക്ഷ്മി പ്രിയ തുടങ്ങിയ പ്രമുഖ താരങ്ങള്‍ വേഷമിടുന്നു. തനിക്ക് യോജിച്ച കഥാപാത്രം ലഭിക്കുകയാണെങ്കില്‍ മലയാളത്തില്‍ അഭിനയിക്കാന്‍ താല്‍പ്പര്യമാണെന്ന് അദ്ദേഹം നേരത്തെ തന്നെ വ്യക്തമാക്കിയിരുന്നു. ജയറാമും, വിജയ് സേതുപതിയും തുല്യപ്രാധാന്യമുള്ള കഥാപാത്രങ്ങളായാണ് ചിത്രത്തില്‍ എത്തുന്നത്. ഈ ചിത്രത്തിന്റെ നിര്‍മ്മാണം സത്യം ഓഡിയോസാണ്. അവര്‍ ആദ്യമായി സിനിമാ നിര്‍മ്മാണ രംഗത്തേയ്ക്ക് കടന്നു വരുന്ന ചിത്രം കൂടിയാണ് ‘മാര്‍ക്കോണി മത്തായി’.
