ന്യൂഡല്‍ഹി:ലോക്‌സഭാ തെരഞ്ഞെടുപ്പ് അടുത്തിരിക്കെ കോണ്‍ഗ്രസിന് തിരിച്ചടി.കോണ്‍ഗ്രസ് നേതാവ് ടോം വടക്കന്‍ ബിജെപിയില്‍ ചേര്‍ന്നു.കേന്ദ്രമന്ത്രി രവി ശങ്കര്‍ പ്രസാദില്‍ നിന്നാണ് ടോം വടക്കന്‍ അംഗത്വം സ്വീകരിച്ചത്.പുല്‍വാമ ആക്രമണത്തില്‍ കോണ്‍ഗ്രസ് എടുത്ത നിലപാടില്‍ പ്രതിഷേധിച്ചാണ് രാജിവെച്ചതെന്ന് ടോം വടക്കന്‍ പറഞ്ഞു.കോണ്‍ഗ്രസ് വക്താവും എഐസിസി ജനറല്‍ സെക്രട്ടറിയുമായിരുന്നു ടോം വടക്കന്‍.
ഉപയോഗിച്ച് വലിച്ചെറിയുന്ന രീതിയാണ് കോണ്‍ഗ്രസിനുള്ളതെന്നും കോണ്‍ഗ്രസിലെ കുടുംബാധിപത്യം മടുപ്പിക്കുന്നുവെന്നും ടോം വടക്കന്‍ മാധ്യമങ്ങളോട് പറഞ്ഞു.പ്രധാനമന്ത്രി മോദിയുടെ വികസന കാഴ്ചപ്പാട് ആകര്‍ഷിച്ചു.മോദി ഇന്ത്യക്ക് ശോഭനമായ ഭാവി നല്‍കുമെന്നും കോണ്‍ഗ്രസിന് ആരാണ് നേതാവെന്നറിയാത്ത അവസ്ഥയാണെന്നും ടോം വടക്കന്‍ പറഞ്ഞു.
