കൊല്ലം:മുന്‍മന്ത്രിയും മുതിര്‍ന്ന കോണ്‍ഗ്രസ് നേതാവുമായ കടവൂര്‍ ശിവദാസന്‍ (88) അന്തരിച്ചു.ഇന്നു പുലര്‍ച്ചെ തിരുവനന്തപുരത്തെ സ്വകാര്യ ആശുപത്രിയിലായിരുന്നു അന്ത്യം.മൃതദേഹം 10 മണിക്ക് കൊല്ലം ഡിസിസിയില്‍ പൊതുദര്‍ശനത്തിന് വയ്ക്കും.തുടര്‍ന്ന് 11.30 മുതല്‍ ആനന്ദവല്ലീശ്വരത്തെ വീട്ടിലും പൊതുദര്‍ശനമുണ്ടാവും. വൈകീട്ട് നാലിന് മുളങ്കാടകം ശ്മശാനത്തില്‍ സംസ്‌കാരം നടക്കും.
കെ കരുണാകരന്‍,എകെ ആന്റണി തുടങ്ങിയവരുടെ മന്ത്രിസഭകളിലായി നാല് തവണ മന്ത്രി ആയിരുന്നു.1991,1996,2001 എന്നിങ്ങനെ തുടര്‍ച്ചയായി 15 വര്‍ഷം കോണ്‍ഗ്രസിന് വേണ്ടി അദ്ദേഹം കൊല്ലം, കുണ്ടറ മണ്ഡലങ്ങളില്‍ നിന്നും മത്സരിച്ചു ജയിച്ചു. ആര്‍എസ്പിയിലൂടെ രാഷ്ട്രീയത്തിലെത്തിയ കടവൂര്‍ ശിവദാസന്‍ 1980-ലും 82-ലും ആര്‍എസ്പി പ്രതിനിധിയായി നിയമസഭയിലേക്ക് മത്സരിച്ചു ജയിച്ചിട്ടുണ്ട്.തുടര്‍ന്ന് കോണ്‍ഗ്രസിലെത്തിയ കടവൂര്‍ കൊല്ലത്ത് പാര്‍ട്ടിയുടെ അനിഷേധ്യ നേതാവായി മാറി.
വിജയമ്മയാണ് ഭാര്യ.മിനി,ഷാജി ശിവദാസന്‍ എന്നിവര്‍ മക്കളാണ്.
