കോഴിക്കോട്:മുക്കം ഓമശ്ശേരിക്കു സമീപമുള്ള ജ്വല്ലറിയില്‍ മുഖം മൂടി സംഘം തോക്കു ചൂണ്ടി മോഷണം നടത്തി.മുക്കം റോഡില്‍ പ്രവര്‍ത്തിക്കുന്ന ‘ശാദി ഗോള്‍ഡി’ലാണ് കവര്‍ച്ച നടന്നത്.സംഭവത്തില്‍ ഒരു അന്യസംസ്ഥാനക്കാരന്‍ പിടിയിലായെങ്കിലും രണ്ടുപേര്‍ രക്ഷപ്പെട്ടു. കടയില്‍ നിന്നും പതിനഞ്ചോളം സ്വര്‍ണവളകള്‍ കവര്‍ച്ച ചെയ്താണ് ഇവര്‍ കടന്നു കളഞ്ഞത്.മോഷ്ടാക്കള്‍ക്കായി പോലീസും നാട്ടുകാരും പ്രദേശത്ത് തെരച്ചില്‍ നടത്തുകയാണ്.
വൈകുന്നേരം ഏഴരയോടെയായിരുന്നു കവര്‍ച്ച. ജീവനക്കാര്‍ ജ്വല്ലറി പൂട്ടി പോകാനൊരുങ്ങുന്നതിനിടെയാണ് മുഖംമൂടി ധരിച്ച മൂന്ന് പേര്‍ തോക്കുമായി എത്തിയത്. ഒരാള്‍ ജീവനക്കാര്‍ക്കുനേരെ തോക്കുചൂണ്ടി ഭയപ്പെടുത്തി. മറ്റു രണ്ട് പേര്‍ കൗണ്ടറില്‍ കയറി പണവും ആഭരണങ്ങളും എടുക്കുകയായിരുന്നു.
എന്നാല്‍ മോഷണത്തിനുശേഷം രക്ഷപ്പെടാനൊരുങ്ങുന്നതിനിടെ ഇവരില്‍ ഒരാളെ ജീവനക്കാരും സമീപത്തെ കടകളിലുള്ളവരും ചേര്‍ന്ന് ബലമായി കീഴടക്കുകയായിരുന്നു. ഇയാള്‍ പശ്ചിമബംഗാള്‍ സ്വദേശിയാണ്. ഇയാളുടെ കൈയില്‍ നിന്നും തോക്ക്, കത്തി, മൊബൈല്‍ ഫോണ്‍ എന്നിവ പിടികൂടി.
