തിരുവനന്തപുരം: രഞ്ജി ട്രോഫി ക്രിക്കറ്റ് ടൂര്‍ണ്ണമെന്റിലെ ഗ്രൂപ്പ് ബി മത്സരത്തില്‍ കേരളം ഇന്ന് ജമ്മു കാശ്മീരിനെ നേരിടും. നാല് വരെയാണ് മത്സരം. തുമ്പ സെന്റ് സേവ്യേഴ്‌സ് കോളേജ് ഗ്രൗണ്ടില്‍ രാവിലെ ഒമ്പതിന് മത്സരം ആരംഭിക്കും. കഴിഞ്ഞ മുന്നു മത്സരങ്ങളില്‍ രണ്ട് വിജയവും ഒരു പരാജയവുമായി കേരളം ഗ്രൂപ്പില്‍ മുന്നാം സ്ഥാനത്താണ്. കേരളത്തിന് 12 പോയിന്റുണ്ട്.
കഴിഞ്ഞ മൂന്നു മത്സരങ്ങളില്‍ നിന്നും മൂന്നു പോയിന്റുമായി ജമ്മു കാശ്മീര്‍ ഗ്രൂപ്പില്‍ ആറാം സ്ഥാനത്താണ്. ജമ്മുവില്‍ നടക്കാനിരുന്ന കേരള ജമ്മു കശ്മീര്‍ മത്സരം കേരളത്തിലേക്ക് മാറ്റുകയായിരുന്നു. നവംബര്‍ 17ന് ആരംഭിക്കാനിരിക്കുന്ന സൗരാഷ്ട്രക്കെതിരെയുള്ള മത്സരവും തുമ്പ സെന്റ് സേവ്യേഴ്‌സ് കോളേജ് ഗ്രൗണ്ടിലാണ് നടക്കുക. കാണികള്‍ക്ക് പ്രവേശനം സൗജന്യമാണ്.
കേരള ടീം: സച്ചിന്‍ബേബി (ക്യാപ്റ്റന്‍), സഞ്ജു സാംസണ്‍, രോഹന്‍ പ്രേം, ജലജ് സക്‌സേന, അരുണ്‍ കാര്‍ത്തിക്, സന്ദീപ് വാര്യര്‍, ബേസില്‍ തമ്പി, എം.ഡി നിധീഷ്, സിജോമോന്‍ ജോസഫ്, വിഷ്ണു വിനോദ്, സല്‍മാന്‍ നിസാര്‍, ഫാബിദ് ഫാറൂഖ്, ആസിഫ് കെ.എം, നിഖിലേഷ് സുരേന്ദ്രന്‍, കെ.സി അക്ഷയ്.
