സംഗീത വിസ്മയം എ.ആര്‍.റഹ്മാന്‍ മലയാള സിനിമയ്ക്കായി സംഗീതമൊരുക്കുന്നു. യോദ്ധ എന്ന ചിത്രത്തിനു ശേഷം പൃഥിരാജ് നായകാനാകുന്ന ആട് ജിവിതം എന്ന ചിത്രത്തിനുവേണ്ടിയാണ് എ.ആര്‍.റഹ്മാന്‍ സംഗീതമൊരുക്കുന്നത്. ആദ്യഗാനത്തിന്റെ റെക്കോര്‍ഡിംഗ് കഴിഞ്ഞുവെന്നാണ് റിപ്പോര്‍ട്ടുകള്‍. ഇതില്‍ ഒരു ഗാനം ആലപിക്കുന്നത് വിജയ് യേശുദാസ് ആണ്. വര്‍ഷങ്ങള്‍ക്കു ശേഷം റഹ്മാൻ മലയാളത്തിലേക്ക് തിരിച്ചുവരുന്നെന്ന സന്തോഷത്തിലാണ് അദ്ദേഹത്തിന്റെ ആരാധകര്‍. ബെന്യാമിന്‍ എഴുതിയ ആടുജീവിതം എന്ന നോവലിനെ ആസ്പദമാക്കി ഈ ചിത്രം സംവിധാനം ചെയ്യുന്നത് ബ്ലെസ്സിയാണ്. ബിഗ്ബജറ്റിലാണ് ചിത്രം ഒരുക്കുന്നത്. കെ.ജി.എ ഫിലിംസിന്റെ ബാനറില്‍ കെ.ജി.അബ്രഹാമാണ് ആടുജീവിതം നിര്‍മ്മിക്കുന്നത്. കുട്ടനാടും, ജോര്‍ദ്ദാനുമാണ് പ്രധാന ലൊക്കേഷനുകള്‍. അമലാപോള്‍, വിനീത് ശ്രീനിവാസന്‍, അപര്‍ണ ബാലമുരളി, സന്തോഷ് കീഴാറ്റൂര്‍, ലെന തുടങ്ങിയവരാണ് ചിത്രത്തിലെ മറ്റു താരങ്ങള്‍. സംഗീത മാന്ത്രികന്റെ മ്യൂസിക്കല്‍ മാജിക്കിനായുള്ള കാത്തിരിപ്പിലാണ് മലയാളി ആസ്വാദകർ.
