ചെന്നൈ :കാര്‍ത്തിയെ നായകനാക്കി ജിത്തുജോസഫ് തമിഴില്‍ ഒരുക്കുന്ന ‘തമ്പി’യുടെ ഫസ്റ്റ് ലുക്ക് പോസ്റ്റര്‍ റിലീസ് ചെയ്തു. സൂര്യയാണ് ട്വിറ്ററിലൂടെ ചിത്രത്തിന്റെ ഫസ്റ്റ് ലുക്ക് പോസ്റ്റര്‍ പുറത്തുവിട്ടത്. കാര്‍ത്തിയുടെ മൂത്തസഹോദരിയായി ജ്യോതികയെത്തുന്നു. ആദ്യമായിട്ടാണ് കാര്‍ത്തിയും, ജ്യോതികയും ഒന്നിച്ച് അഭിനയിക്കുന്നത്. ചിത്രത്തില്‍ സത്യരാജിന്റെ മക്കളായിട്ടാണ് ഇവര്‍ എത്തുന്നത്. കൈദിയ്ക്ക് ശേഷം പുറത്തുവരുന്ന കാര്‍ത്തി ചിത്രമായിരിക്കും തമ്പി. ദൃശ്യത്തിന്റെ തമിഴ് റീമേക്കായ പാപനാശത്തിനുശേഷം ജീത്തുജോസഫ് സംവിധാനം ചെയ്യുന്ന തമിഴ് ചിത്രമാണിത്. കാര്‍ത്തി നായകനായി അടുത്തിടെ പുറത്തിറങ്ങിയ ചിത്രം കൈദി അഭൂതപൂര്‍വ്വമായ വിജയം നേടിക്കൊണ്ടിരിക്കുയാണ്. കാര്‍ത്തിയുടെ കരിയരിലെ ഏറ്റവും വലിയ വിജയമാണ് കൈദി. ലോകേഷ് കനകരാജ് സംവിധാനം ചെയ്ത ഈ ആക്ഷന്‍ ത്രില്ലര്‍ ചിത്രം ആഗോള ബോക്സ് ഓഫീസില്‍ 100 കോടി ക്ലബ്ബില്‍ പ്രവേശിച്ചു. ആദ്യമായാണ് ഒരു കാര്‍ത്തി ചിത്രം 100 കോടി ക്ലബ്ബില്‍ ഇടം നേടുന്നത്. അതുകൊണ്ട് തന്നെ അദ്ദേഹത്തിന്റെ വരാനിരിക്കുന്ന ചിത്രവും പ്രേക്ഷകര്‍ വളരെ ആകാംക്ഷയോടെയാണ് നോക്കികാണുന്നത്. പ്രത്യേകിച്ച് കാര്‍ത്തിയുടെ സഹോദരിയായി ജ്യോതിക എത്തുന്നതും ഈ സിനിമയുടെ മാര്‍ക്കറ്റ് വാല്യു കൂട്ടുന്നു.
