27 വര്‍ഷങ്ങള്‍ക്കു ശേഷം രജനി പോലീസ് വേഷത്തിലെത്തുന്ന ചിത്രമാണ് ദര്‍ബാര്‍. സൂപ്പര്‍സ്റ്റാറിനെ നായകനാക്കി എ.ആര്‍.മുരുകദോസ് സംവിധാനം ചെയ്യുന്ന ദര്‍ബാറിന്റെ ട്രെയിലര്‍ കഴിഞ്ഞ ദിവസമാണ് പുറത്തിറക്കിയത്. നയന്‍താരയാണ് ദർബാറിലെ നായിക. രജനികാന്തും നയന്‍താരയും ഒന്നിക്കുന്ന നാലാമത്തെ ചിത്രമാണ് ദര്‍ബാര്‍. മാസും ആക്ഷനും ഒന്നിക്കുന്ന ചിത്രത്തിന്റെ മോഷന്‍ പോസ്റ്റര്‍ സോഷ്യല്‍മീഡിയയില്‍ വന്‍തരംഗം സൃഷ്ടിച്ചിരുന്നു. രജനീകാന്തും സംവിധായകന്‍ മുരുകദോസും ആദ്യമായി ഒന്നിക്കുന്ന ചിത്രം കൂടിയാണിത്. വിജയിനെ നായകനാക്കി ഒരുക്കിയ സര്‍ക്കാരിനു ശേഷം ഇദ്ദേഹം ഒരുക്കുന്ന ചിത്രമാണ് ദര്‍ബാര്‍. ചിത്രം പൊളിറ്റിക്കല്‍ മാസ് എന്റര്‍ടെയ്‌നറാണെന്നാണ് റിപ്പോര്‍ട്ടുകള്‍. സ്‌റ്റൈല്‍ മന്നന്റെ 167-ാമത്തെ ചിത്രമാണിത്. സുനില്‍ഷെട്ടിയാണ് ചിത്രത്തിലെ വില്ലന്‍കഥാപാത്രത്തെ അവതരിപ്പിക്കുന്നത്. ലൈക്ക പ്രൊഡക്ഷന്‍സാണ് ചിത്രത്തിന്റെ നിര്‍മ്മാതാക്കള്‍. അനിരുദ്ധ് രവിചന്ദറാണ് ചിത്രത്തിന്റെ സംഗീതസംവിധാനം നിര്‍വ്വഹിക്കുന്നത്. സന്തോഷ് ശിവന്‍ ചിത്രത്തിന്റെ ക്യാമറ കൈകാര്യംചെയ്തിരിക്കുന്നു. ഹിന്ദി ട്രെയിലറാണ് ഇപ്പോള്‍ പുറത്ത് വിട്ടിരിക്കുന്നത്. 2020 ജനുവരി 10ന് ചിത്രം തിയറ്ററുകളിലെത്തും.
