ടേക്ക് ഓഫ് എന്ന ഹിറ്റ് ചിത്രം ഒരുക്കിയ സംവിധായകന്‍ മഹേഷ് നാരായണന്‍ ഫഹദിനെ നായകനാക്കി ഒരുക്കുന്ന ചിത്രമായ മാലിക്കിന്റെ ഫസ്റ്റ് ലുക്ക് പോസ്റ്റര്‍ പുറത്തുവിട്ടു. മലയാളത്തിന്റെ സൂപ്പര്‍താരങ്ങളായ മമ്മൂട്ടിയും മോഹന്‍ലാലും ചേര്‍ന്നാണ് ചിത്രത്തിന്റെ ഫസ്്റ്റ് ലുക്ക് പോസ്റ്റര്‍ റിലീസ് ചെയ്തിരിക്കുന്നത്. ഫഹദ് ഫാസിലിന്റെ കരിയറിലെ ഏറ്റവും വലിയ ചിത്രമായിട്ടാണ് മാലിക് വരുന്നത്. ബിഗ് ബഡ്ജറ്റില്‍ ഒരുക്കുന്ന സിനിമ ആന്റോ ജോസഫാണ് നിര്‍മ്മിക്കുന്നത്. ഈ ചിത്രത്തിനായി ഫഹദ് ഗംഭീര മേക്ക്ഓവറാണ് നടത്തിയിരിക്കുന്നത്. ശരീരഭാരം നന്നെ കുറച്ച ഫഹദിന്റെ ചിത്രങ്ങള്‍ ആഴ്ചകള്‍ക്കു മുമ്പ് സോഷ്യല്‍ മീഡിയയില്‍ നിറഞ്ഞിരുന്നു. ഈ പോസ്റ്ററില്‍ സാള്‍ട്ട് ആന്റ് പെപ്പര്‍ ലുക്കാണ് ഫഹദിന്. ഹോളിവുഡ് ആക്ഷന്‍ കൊറിയോഗ്രാഫര്‍ ലീ വിറ്റാക്കര്‍ ആണ് ചിത്രത്തിന്റെ സംഘട്ടനരംഗങ്ങള്‍ ഒരുക്കിയിരിക്കുന്നത്. നിമിഷ സജയന്‍ നായികയാവുന്ന ചിത്രത്തില്‍ ജോജു ജോര്‍ജ്ജ്, വിനയ് ഫോര്‍ട്ട്, ദിലീഷ് പോത്തന്‍, ജലജ തുടങ്ങിയ താരങ്ങളും എത്തുന്നുണ്ട്. 27 കോടിയോളം മുതല്‍മുടക്കിലാണ് ചിത്രം ഒരുങ്ങുന്നത്. ഫഹദിന്റെ പുത്തന്‍മേക്ക്ഓവര്‍ലുക്ക് പോലെ തന്നെ ചിത്രവും വമ്പന്‍ഹിറ്റാവുമെന്ന പ്രതീക്ഷയിലാണ് ആരാധകരും.
