വ്യത്യസ്ത കഥാപാത്രങ്ങളുമായി മലയാളി പ്രേക്ഷകരുടെ മനസ്സിലിടം നേടിയ നടനാണ് ജയസൂര്യ. ഇപ്പോള്‍ കടമറ്റത്ത് കത്തനാരായി അദ്ദേഹം പ്രേക്ഷകരെ വിസ്മയിപ്പിക്കാനെത്തുകയാണ്. മുമ്പും കടമറ്റത്ത് കത്തനാരെ കഥാപത്രമാക്കി സിനിമകളും, സീരിയലുകളും വന്നിട്ടുണ്ടെങ്കിലും ഇപ്പോഴിതാ ത്രീഡി-ഫാന്റസിയായാണ് ചിത്രമൊരുങ്ങുന്നത്. ഫിലിപ്‌സ് & മങ്കിപ്പെന്‍, ജോ & ദി ബോയ് തുടങ്ങിയ ചിത്രങ്ങളുടെ സംവിധായകനായ റോജിന്‍ തോമസ് ആണ് ജയസൂര്യയെ നായകനാക്കി കടമറ്റത്ത് കത്തനാര്‍ എന്ന സിനിമ ഒരുക്കുന്നത്. തിരക്കഥ ആര്‍.രാമനന്ദ് ആണ്. രണ്ട് ഭാഗങ്ങളായാണ് ചിത്രം റിലീസിനെത്തുന്നത്. അതില്‍ ഒന്നാം ഭാഗത്തിന്റെ ലോഞ്ച് ടീസറാണ് ഇപ്പോള്‍ റിലീസ് ചെയ്തിരിക്കുന്നത്. വലിയ മുതല്‍ മുടക്കിലൊരുങ്ങുന്ന ചിത്രം നിര്‍മ്മിക്കുന്നത് നിര്‍മ്മാതാവും നടനുമായ വിജയ് ബാബുവിന്റെ ഫ്രൈഡേ ഫിലിം ഹൗസ് ആണ്. ജയസൂര്യയും വിജയ് ബാബുവും ഒന്നിക്കുന്ന എട്ടാമത്തെ സിനിമ കൂടിയാണിത്. ഉയര്‍ന്ന സാങ്കേതിക നിലവാരത്തിലൊരുങ്ങുന്ന ഈ ചിത്രം പ്രേക്ഷകരെ വിസ്മയിപ്പിക്കുമെന്നാണ് റിപ്പോര്‍ട്ടുകള്‍.
