പിടികിട്ടാപ്പുള്ളി സുകുമാരകുറുപ്പായി ദുല്‍ഖര്‍ എത്തുന്ന ചിത്രമായ കുറുപ്പിന്റെ ചിത്രീകരണം പൂര്‍ത്തിയായി. സെക്കന്റ് ഷോയുടെ സംവിധായകനായ ശ്രീനാഥ് രാജേന്ദ്രന്‍ ആണ് ഈ ചിത്രമൊരുക്കുന്നത്. സുകുമാരകുറിപ്പിന്റെ ജീവിതമാണ് ചിത്രത്തിലൂടെ വരച്ചുകാട്ടുന്നത്. അഞ്ചുവര്‍ഷത്തെ കാത്തിരിപ്പിനൊടുവിലാണ് കുറുപ്പ് എന്ന് പേരിട്ടിരിക്കുന്ന ചിത്രത്തിന്റെ ഷൂട്ടിംഗ് ആരംഭിച്ചത്. ദുല്‍ഖര്‍ സല്‍മാന്റെ പ്രൊഡക്ഷന്‍സ് ആയ വേഫെറര്‍ ഫിലിംസ് തന്നെയാണ് ചിത്രത്തിന്റെ നിര്‍മ്മാണം നിര്‍വ്വഹിക്കുന്നത്. ദുല്‍ഖര്‍ പ്രൊഡക്ഷന്‍സിന്റേതായി അണിയറയില്‍ പുരോഗമിക്കുന്ന മൂന്നാമത്തെ ചിത്രമാണ് ഇത്. കെ.എസ്.അരവിന്ദ്, ദാനില്‍ സായൂജ് എന്നിവരാണ് കുറിപ്പിനായി തിരക്കഥ ഒരുക്കിയിരിക്കുന്നത്. ഇന്ദ്രജിത്ത്, ഷൈന്‍ടോംചാക്കോ എന്നിവര്‍ മറ്റു പ്രധാന കഥാപാത്രങ്ങളായെത്തുന്നു. ചിത്രത്തിലേതായി പുറത്തിറങ്ങിയ പോസ്റ്ററുകളെല്ലാം സോഷ്യല്‍ മീഡിയയില്‍ വൈറലായിയിരുന്നു. ചിത്രത്തില്‍ ദുല്‍ഖര്‍ വിവിധ ഗെറ്റപ്പുകളിലാണ് എത്തുന്നത്. ഷൂട്ടിങ്ങ് സെറ്റുകളില്‍ നിന്ന് പുറത്തു വന്നിരുന്ന ചിത്രങ്ങള്‍ സോഷ്യല്‍ മീഡിയയില്‍ വൈറലായി മാറിയിരുന്നു. കേരളത്തിലെ കുപ്രസിദ്ധനായ പിടികിട്ടാപ്പുള്ളി സുകുമാരകുറുപ്പ് എവിടെ എന്ന ചോദ്യത്തിന് ചിത്രത്തിലൂടെ മറുപടി കിട്ടുമെന്ന പ്രതീക്ഷയില്‍ മലയാളികൾ.
