മലയാളത്തില്‍ ഏറെ ജനപ്രീതിയും നിരൂപക പ്രശംസയും നേടിയ ചിത്രമായ അയ്യുപ്പനും കോശിയുടെയും പകര്‍പ്പകവകാശം സ്വന്തമാക്കിയിരിക്കുകയാണ് ബോളിവുഡ് താരം ജോണ്‍ എബ്രഹാം. സച്ചി തിരക്കഥ എഴുതി സംവിധാനം ചെയ്ത് പൃഥിരാജും, ബിജുമേനോനും പ്രധാന വേഷത്തില്‍ എത്തിയ ഈ ചിത്രം ബോക്‌സ് ഓഫീസില്‍ മികച്ച വിജയം നേടിയിരുന്നു. ആക്ഷന്‍ ത്രില്ലര്‍ സ്വഭാവവും മികച്ച കഥാപരിസരമുള്ള ചിത്രം ജോണിനെ ആകര്‍ഷിച്ചതിനെ തുടര്‍ന്നാണ് റീമേക്ക് ചെയ്യാനുള്ള അവകാശം സ്വന്തമാക്കിയത് എന്നാണ് റിപ്പോര്‍ട്ടുകള്‍. തന്റെ നിര്‍മ്മാണ കമ്പനിയായ ജെഎ എന്റര്‍ടെയിന്‍മെന്റിന്റെ ബാനറിലാണ് ജോണ്‍ എബ്രഹാം ചിത്രം നിര്‍മ്മിക്കുക. ”ജെഎ” എന്റെര്‍ടൈന്‍മെന്റിലൂടെ ആകര്‍ഷകരമായ കഥകള്‍ പ്രേക്ഷകരിലേക്ക് എത്തിക്കുവാന്‍ ഞങ്ങള്‍ താല്‍പ്പര്യപ്പെടുന്നു. ഈ ഹിന്ദി റീമേക്ക് ശരിക്കും ആകര്‍ഷകമായ ഒന്നായിരിക്കുമെന്ന് ഞങ്ങള്‍ പ്രതീക്ഷിക്കുന്നു. ജോണ്‍ ട്വീറ്റ് ചെയ്യുന്നു. ചിത്രത്തില്‍ ജോണ്‍ അഭിനയിക്കുന്നുണ്ടോ എന്ന കാര്യത്തില്‍ വ്യക്തതയില്ല. അതേ സമയം അയ്യപ്പനും കോശിയും തമിഴിലും, തെലുങ്കിലും റീമേക്കിന് ഒരുങ്ങുന്നുണ്ട്.
