വിക്രമിനെ നായകനാക്കി കാര്‍ത്തിക് സുബ്ബരാജ് സംവിധാനം ചെയ്യുന്ന ചിത്രത്തില്‍ ധ്രുവ് വിക്രമും പ്രധാന വേഷത്തിലെത്തുന്നു. ഈ ചിത്രത്തെക്കുറിച്ചുള്ള റിപ്പോര്‍ട്ടുകള്‍ വന്നതുമുതല്‍ ഈ അച്ഛന്‍-മകന്‍ കോമ്പോ ഒന്നിക്കുമോ എന്ന ആകാംക്ഷയിലായിരുന്നു പ്രേക്ഷകര്‍. എന്നാല്‍ കേട്ട വാര്‍ത്തകളൊക്കെ സത്യമായിരിക്കുകയാണ്.
ആദിത്യ വര്‍മ എന്ന ചിത്രത്തിലൂടെ കോളിവുഡില്‍തന്റേതായ സ്ഥാനം ഉറപ്പിച്ച ധ്രുവിനും നിരവധി ആരാധകരാണുള്ളത്. വിക്രമിന്റെ കരിയറിലെ 60-ാമത്തെ ചിത്രത്തിന് ചിയാന്‍ 60 എന്നാണ് പേര് നല്‍കിയിരിക്കുന്നത്. ഗാങ്‌സ്റ്റര്‍ ഡ്രാമ ഗണത്തില്‍പ്പെട്ട സിനിമ സെവന്‍ സ്‌ക്രീന്‍ സ്റ്റുഡിയോയാണ് നിര്‍മിക്കുന്നത്. ധനുഷ് നായകനായ ജഗമേ തന്തിരമാണ് കാര്‍ത്തിക് സുബ്ബരാജിന്റെ ഇറങ്ങാനിരിക്കുന്ന സിനിമ. കോബ്രയാണ് വിക്രമിന്റെ റിലീസ് കാത്തിരിക്കുന്ന സിനിമ. മണിരത്‌നം സംവിധാനം ചെയ്യുന്ന പൊന്നിയിന്‍ സെല്‍വത്തിലും വിക്രം ഒരു വേഷം ചെയ്യുന്നുണ്ട്. എന്തായാലും ചിയാന്‍ വിക്രമിന്റെയും മകന്റെയും അഡാറ് കോമ്പോയ്‌ക്കൊപ്പം കാര്‍ത്തിക്കിന്റെ സംവിധാനവും കൂടിച്ചേരുമ്പോഴുള്ള മാസ് സിനിമയ്ക്കായുള്ള കാത്തിരിപ്പിലാണ് ആരാധകര്‍
