ഫ്രൈഡേ ഫിലിംഹൗസിന്റെ ബാനറില്‍ വിജയ് ബാബു നിര്‍മ്മിച്ച ചിത്രമായ സൂഫിയും സുജാതയുടെയും ട്രെയിലര്‍ പുറത്തിറങ്ങി. ജയസൂര്യയും അതിഥി റാവുമൊന്നിക്കുന്ന ഈ മ്യൂസിക്കല്‍ റൊമാന്റിക് ചിത്രം ജൂലൈ മൂന്നിന് ആമസോണ്‍ പ്രൈമില്‍ റിലീസിനെത്തും. സംസാരശേഷിയില്ലാത്ത സുജാതയ്ക്ക് (അതിഥി റാവു) സൂഫി സന്യാസിയായ ദേവ് മോഹനോട് തോന്നുന്ന പ്രണയമാണ് ചിത്രം പറയുന്നത്. നരണിപ്പുഴ ഷാനവാസാണ് ഈ ചിത്രത്തിന്റെ തിരക്കഥയും സംവിധാനവും നിര്‍വ്വഹിച്ചിരിക്കുന്നത്. അനു മൂത്തേടത്ത് ഛായാഗ്രഹണം നിര്‍വ്വഹിച്ചിരിക്കുന്നു. ഹരിനാരായണന്റെ വരികള്‍ക്ക് എം.ജയചന്ദ്രന്‍ സംഗീതമൊരുക്കിയിരിക്കുന്നു.
ആദ്യം തിയേറ്റര്‍ റിലീസ് തീരുമാനിച്ചിരുന്ന സൂഫിയും സുജാതയും കോവിഡ് 19 ന്റെ പശ്ചാത്തലത്തിലാണ് ഡിജിറ്റല്‍ ഫ്‌ളാറ്റ്‌ഫോമില്‍ റിലീസ് ചെയ്യാം എന്നു അണിയറക്കാര്‍ തീരുമാനിച്ചത്. ഇതുമായി ബന്ധപ്പെട്ട് വിവാദങ്ങളും ചര്‍ച്ചകളുമൊക്കെ സിനിമാ മേഖലയില്‍ ഉണ്ടാകുകയും, വിജയ് ബാബുവിന്റെയും ജയസൂര്യയുടെയും ഒരു ചിത്രവും ഇനി തിയേറ്റര്‍ കാണില്ലെന്ന് ഫിലിം എക്‌സിബിറ്റേഴ്‌സ് ഫെഡറേഷന്‍ പ്രസിഡന്റ് ലിബര്‍ട്ടി ബഷീര്‍ പറയുകയും ചെയ്തിരുന്നു. പക്ഷെ അതിനെയെല്ലാം തരണം ചെയ്തുകൊണ്ട് ഒടുവില്‍ ചിത്രമിപ്പോള്‍ ആമസോണ്‍ പ്രൈമില്‍ റിലീസിനെത്തുകയാണ്. ആഗോള പ്രീമിയറിലൂടെ 200ലേറെ രാജ്യങ്ങളിലുള്ള പ്രേക്ഷകര്‍ക്ക് സൂഫിയും സുജാതയും റിലീസ് ദിനം തന്നെ ആസ്വാദിക്കാന്‍ കഴിയും.
