ദുല്‍ഖറിന്റെ പിറന്നാള്‍ദിനത്തില്‍ ‘ കുറിപ്പി ‘ ന്റെ സ്‌നീക്ക്പീക്ക് വീഡിയോ പുറത്തിറക്കിയിരിക്കുന്നത് അദ്ദേഹത്തിന്റെ ആരാധകരെയും പ്രേക്ഷകരെയും ഒരുപോലെ ആവേശം കൊള്ളിച്ചിരിക്കുകയാണ്. ദുല്‍ഖറിന്റെ ആദ്യചിത്രമായ സെക്കന്റ് ഷോ ഒരുക്കിയ ശ്രീനാഥ് രാജേന്ദ്രന്‍ സംവിധാനം ചെയ്യുന്ന ഈ ചിത്രം ദുല്‍ഖറിന്റെ കരിയറിലെ തന്നെ ഏറ്റവും വലിയ ബഡ്ജറ്റില്‍ ഒരുങ്ങുന്ന ചിത്രം കൂടിയാണ്. ഏകദേശം 35 കോടിയാണ് ചിത്രത്തിന്റെ ബഡ്ജറ്റ്‌. താരത്തിന്റെ തന്നെ ഉടമസ്ഥതയിലുള്ള വേഫറെര്‍ ഫിലിംസും എം സ്റ്റാര്‍ എന്റര്‍ടെയ്ന്‍മെന്റ്‌സും ചേര്‍ന്നാണ് ചിത്രത്തിന്റെ നിര്‍മ്മാണം.
കേരളത്തിലെ കുപ്രസിദ്ധ പിടികിട്ടാപ്പുള്ളി സുകുമാരകുറിപ്പിന്റെ ജീവിതത്തെ ആസ്പദമാക്കി ഒരുക്കുന്ന ഈ ചിത്രം പെരുന്നാള്‍ റിലീസായി തിയേറ്ററിലെത്തേണ്ടതായിരുന്നു. എന്നാല്‍ കൊവിഡ് 19 പടര്‍ന്ന് പിടിക്കുന്ന സാഹചര്യത്തില്‍ ചിത്രത്തിന്റെ റിലീസ് നീണ്ടുപോകുകയാണ്. മൂത്തോന്‍ എന്ന ചിത്രത്തിലൂടെ മലയാളത്തിലേക്ക് അരങ്ങേറ്റം കുറിച്ച ശോഭിത ധുലിപാലയാണ് ചിത്രത്തിലെ നായിക. ഇവരെ കൂടാതെ ഇന്ദ്രജിത്ത്, സണ്ണിവെയ്ന്‍, ഷൈന്‍ടോംചാക്കോ, വിജയരാഘവന്‍, പി.ബാലചന്ദ്രന്‍, സുരഭി ലക്ഷ്മി, ശിവജിത് പദ്മനാഭന്‍ തുടങ്ങിയവരാണ് ചിത്രത്തിലെ മറ്റു താരങ്ങള്‍. ദുല്‍ഖറിന്റെ ആരാധകര്‍ വളരെ പ്രതീക്ഷയോടെ കാണുന്ന ചിത്രം കൂടിയാണിത്.
