ഹൈദരാബാദ്: ഓസ്ട്രേലിയക്കെതിരായ മൂന്നാം ട്വന്റി-20 മത്സരത്തിന് ഇന്ത്യ ഇന്ന് ഇറങ്ങും.ഏകദിന പരമ്പരയ്ക്കു പിന്നാലെ ട്വന്റി-20 പരമ്പരയും സ്വന്തമാക്കുക എന്നതാണ് ഇന്ത്യയുടെ ലക്ഷ്യം. അതെ സമയം ഒരു പരമ്പര എങ്കിലും സ്വന്തമാക്കി നാണക്കേടില്ലാതെ നാട്ടിലേക്കു മടങ്ങാനാകും ഓസിസിന്റെ ശ്രമം. ആദ്യ ട്വന്റി-20യിൽ മഴനിയമത്തിന്റെ ആനുകൂല്യത്തിൽ ജയിച്ച ഇന്ത്യയെ രണ്ടാം മൽസരത്തിൽ എട്ടു വിക്കറ്റിനു തകർത്തെറിഞ്ഞ ഓസീസാണ് ആത്മവിശ്വാസത്തി‌‍ൽ ഒരുപടി മുന്നിൽ.
മത്സരം നടക്കുന്ന ഹൈദരാബാദില്‍ കഴിഞ്ഞ കുറച്ചു ദിവസങ്ങളിലായി കനത്ത മഴയാണ്. മത്സരം നടക്കുന്ന വെള്ളിയാഴ്ചയും മഴ വില്ലനായേക്കുമെന്നാണ് റിപ്പോര്‍ട്ട്.മഴ പിച്ചിന്റെ സ്വഭാവത്തെയും ബാധിച്ചേക്കുമെന്ന് ക്യൂറേറ്റര്‍ വൈ എല്‍ ചന്ദ്രശേഖര്‍ പറഞ്ഞു. പൊതുവെ വലിയ സ്കോറുകള്‍ പിറക്കാറുള്ള ഉപ്പല്‍ സ്റ്റേഡിയത്തില്‍ പിച്ച് ആരെ തുണയ്ക്കുമെന്ന് കണ്ടറിയേണ്ട കാര്യമാണ്. പരമ്പര നേടാൻ രണ്ടു ടീമുകൾക്കും സാധ്യത തുല്യമായി നിൽക്കുമ്പോൾ മഴ കളിക്കല്ലേ എന്നാണ് ഇരു ടീമുകളുടെയും പ്രാർത്ഥന.
